2022 йил 12 апрелдаги ВМҚ-172-сон қарор 9-банди иккинчи хатбошисида хавфсизлик камарини тақмасликка рухсат берилган шахслар рўйхати келтирилган. Ушбу бандда, шунингдек, саломатлиги хавфсизлик камари тақиш имконини бермайдиган беморларга Соғлиқни сақлаш вазирлиги томонидан белгиланган касалликлар рўйхатига мувофиқ ва ушбу касалликлар билан касалланганлиги бўйича тиббий маълумотнома мавжуд бўлганда хавфсизлик камарини тақмасликка рухсат берилиши қайд этилган.

Бироқ шу кунга қадар ССВ томонидан бу борада тасдиқланган рўйхат мавжуд эмас. Бу эса хавсизлик камарини таққанда руҳий ва жисмоний ҳолатига салбий таъсир қиладиган беморлар (масалан, кўкрак қафаси ёки елка соҳасида оғриқ, жарроҳлик амалиётидан кейинги асоратлар, нафас олишда муаммолар билан оғриганлар) учун қийинчиликларни туғдириб келмоқда.

Соғлиқни сақлаш вазирлиги қонунчиликдаги мазкур бўшлиқни тўлдириш мақсадида саломатлиги хавфсизлик камари тақиш имконини бермайдиган 20 турдаги касаллик ва тиббий ҳолатлар рўйхатини тасдиқлашга доир ҳужжат лойиҳасини эълон қилди. 
       

Қайд этилишича, мазкур ҳужжат жисмоний ёки тиббий ҳолати туфайли хавфсизлик камарини тақиш имконига эга бўлмаган шахслар учун ҳуқуқий ва тиббий асосдаги истисно тартибини белгилаш ҳамда бундай ҳолатларни суиистеъмол қилишнинг олдини олишдан иборат.

Шунингдек, ҳужжат лойиҳасидан кўзланган мақсад:

• Тиббий асосларни аниқлаш – қайси касалликлар ва ҳолатларда хавфсизлик камари организмга зарар етказиши ёки ҳолатни оғирлаштириши мумкинлигини илмий жиҳатдан белгилаш;
• Мутахассис хулосаси тартибини жорий этиш – бундай ҳолатда фақат ваколатли шифокор (терапевт, ортопед, невропатолог ва ҳ.к.) томонидан берилган тиббий хулоса асосида истисно бериш;
• Йўл ҳаракати хавфсизлигини таъминлаш – фуқароларнинг саломатлиги билан бир қаторда умумий хавфсизлик даражасини сақлаб қолиш;
• Қонунчиликни мувофиқлаштириш – “Йўл ҳаракати хавфсизлиги тўғрисида”ги қонун ва Вазирлар Маҳкамаси қарорлари билан уйғунлаштириш.

Тиббий истисно фақат клиник асосда берилади.

Ҳар қандай шахс шахсий хоҳишига кўра эмас, балки шифокор томонидан белгиланган тиббий кўрсатма бўлса, камар тақмасликка рухсат олади.

Маълумотнома муддати чекланган бўлади.

Ҳақиқий бўлмаган маълумотнома берган шифокор ёки фуқарога нисбатан маъмурий жавобгарлик белгиланади.