АҚШ Россия нефти билан боғлиқ айрим операцияларга нисбатан қўйилган санкцияларни вақтинча юмшатди. Бу қарор жаҳон энергетика бозоридаги босимни камайтириш мақсадида қабул қилингани айтилмоқда.

Маълум қилинишича, АҚШ Молия вазирлиги 12 мартга қадар танкерларга юкланган Россия нефти ва нефть маҳсулотлари билан боғлиқ барча операцияларни вақтинча амалга оширишга рухсат берган.

Бу рухсатнома тахминан 30 кунга — апрель ўрталаригача амал қилади. У асосан транзитда қолиб кетган тахминан 100 миллион баррель Россия нефтига тааллуқли.

Шу билан бирга, Вашингтон Россия нефтини Ҳиндистонга етказиб бериш учун алоҳида рухсат бериш механизмини ҳам очгани айтилмоқда. Бундан мақсад жаҳон бозорида нефть таъминотини кўпайтириш ҳисобланади.

Брюсселда бу қарор салбий қабул қилинган. Европа комиссияси Россия нефтига нисбатан санкцияларни юмшатишни «самарасиз қарор» деб атаб, ҳар қандай енгиллаштиришлар фақат вақтинчалик бўлиши кераклигини таъкидлаган.

Мутахассислар фикрича, бу қарор санкциялар бекор қилинганини англатмайди. Аксинча, у глобал энергетика бозоридаги босимни юмшатиш учун қабул қилинган тактик чора сифатида баҳоланмоқда.

Таҳлилчиларга кўра, агар бу вақтинчалик рухсат кейинчалик яна узайтирилса ёки янги лицензиялар берилса, бу ҳолат жаҳон бозори Россия нефтисиз барқарор ишлай олмаслигини англатиши мумкин.