Агар Вашингтон Тайванга йирик ҳажмда қурол-яроғ сотиш режасидан воз кечмаса, Хитой Трампнинг Пекинга режалаштирилаётган ташрифини бекор қилиш билан таҳдид қилди. Бу ҳақда Financial Times манбаларга таяниб хабар берди.

Нашр маълумотларига кўра, АҚШ ҳозирда Тайванга етказиб берилиши режалаштирилаётган янги қурол пакети устида иш олиб бормоқда. Ушбу пакетга Patriot ҳаводан мудофаа тизимлари, NASAMS зенит-ракета мажмуалари ва яна икки номаълум турдаги қурол тизимлари киритилиши мумкин. Пакетнинг умумий қиймати тахминан 20 миллиард долларни ташкил этиши мумкин.

Тайванга қурол сотиш масаласини Хитой Халқ Республикаси раиси Си Цзиньпин 4 февраль куни Дональд Трамп билан бўлиб ўтган телефон мулоқоти чоғида кўтарган. Хитой ТИВ маълум қилишича, Си Цзиньпин АҚШ томонини Тайван масаласида «жуда эҳтиёткор позиция» тутишга чақирган ва қурол етказиб бериш Хитой–АҚШ муносабатларига жиддий зарар етказишини таъкидлаган.

Эслатиб ўтамиз, 2025 йил декабрь ойида Трамп маъмурияти Тайванга 11 миллиард долларлик қурол етказиб бериш режасини эълон қилган эди. Ушбу пакетга HIMARS ўт очиш тизимлари, гаубицалар, танкка қарши ракеталар ҳамда зарбали учувчисиз ҳаво аппаратлари кирган. Бунга жавобан Пекин АҚШнинг мудофаа соҳасига алоқадор 20 та компаниясига нисбатан санкциялар жорий қилган.

Financial Times нашрининг қайд этишича, Дональд Трампнинг Хитойга ташрифи апрель ойига режалаштирилмоқда, бироқ ҳозирча у расман тасдиқланмаган. Трамп охирги марта Пекинга 2017 йилда, ўзининг биринчи президентлик муддати бошида ташриф буюрган эди.