2011 йилдан буён Давлат божхона қўмитаси раиси сифатида ишлаб келаётган полковник Зоҳид Дўсанов 2016 йилнинг 20 декабрида ўша лавозимдан озод қилинган ва Бош прокуратура ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш департаменти бошлиғи этиб тайинланган эди. У божхона тизимига ўтгунига қадар айнан шу лавозимда 2008—2011-йилларда ишлаган.

Шундан сўнг З.Дўсанов Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директорлигига ўтказилган эди. Унинг қачон бу вазифага тайинлангани «Xabar.uz»га маълум эмас. Шунингдек, Бош прокуратура расмий сайтидаги маълумотларга кўра, Солиқ, валютага оид жиноятларга ва жиноий даромадларни легаллаштиришга қарши курашиш департаменти бошлиғи лавозими айни кунгача вакант сифатида қолмоқда.

Соғлиқни сақлаш вазирлиги ахборот хизматининг хабар беришича, Дусанов Зохид Абдукаюмович бошқа ишга ўтганлиги муносабати билан Ўзбекистон Президентининг 2018 йил 12 февралдаги ПҚ-3525-сонли қарорига кўра, мазкур агентликка Абдуллаев Азиз Рустамович раҳбар этиб тайинланган. Собиқ директорнинг айнан қандай ишга ўтгани айтилмади.

Шунингдек, агентлик директори ўринбосарлари ҳам ўзгартирилган. Азиз Абдуллаев  шу вақтгача «Дори воситалар, тиббий буюмлар ва тиббий техника экспертизаси ва стандартизацияси Давлат маркази» ДУК директори сифатида фаолият юритиб келаётган эди.

Эслатиб ўтамиз, Ўзбекистон Президентининг 2018 йил 14 февралдаги «Фармацевтика тармоғини жадал ривожлантириш бўйича қўшимча чора-тадбирлар тўғрисида»ги қарорида мамлакат фармацевтикаси тизимидаги камчилик ва муаммолар танқид остига олинган, хусусан, Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг фармацевтика тармоғини ривожлантириш соҳасидаги ишларни ташкил этиш борасидаги фаолияти қониқарсиз деб топилгани, ишда жиддий камчиликларга йўл қўйганлиги ва лозим даражадаги ташаббускорлик йўқлиги сабабли Ўзбекистон Республикаси Соғлиқни сақлаш вазирлиги ҳузуридаги Фармавцевтика тармоғини ривожлантириш агентлиги директори З.А.Дусанов ва мазкур агентлик директорининг биринчи ўринбосари М.М.Дусмуратов эгаллаб турган лавозимидан озод этилганлиги маълум қилинган эди.