Бугун ижтимоий тармоқлар (хусусан, Threads) орқали дунёнинг исталган нуқтасидаги ноёб хазиналардан бохабар бўлиш мумкин. Sport.onliner нашри минсклик Николай Карповичнинг тўплами ҳам ана шундай ҳайратланарли топилмалардан бири эканлиги ҳақида ёзади. 1970 йиллардан бошлаб то шу кунгача чиқарилган раритет футбол альбомлари ва стикерларини жамлаган бу инсон оддий мухлис эмас.  Унинг архивида вимпеллар, чипталар, дастурлар, футбол ҳақида мақолалар, хабарлар чоп этилган эски газеталар, китоблар сафи кенгайгандан кенгаймоқда. 

Суратлар: Sport.onliner  

Николай спорт оламида ўз ўрнига эга таниқли функционер ва журналист. У ўз вақтида Минск туманининг «Дарида» клуби дублида тўп сурган, афсонавий «Пресбол» газетасида, Россия Олий хоккей лигаси (ВХЛ) директори ўринбосари ҳамда «Матч ТВ» телеканалида масъул лавозимларда ишлаган. Ҳатто мамлакат Олий лигасига муқобил сифатида режалаштирилган «Майстар-ліга» лойиҳаси асосчиларидан бири бўлган. Бугунги кунда эса у болалар футболини ривожлантиришга қаратилган «Nika» лойиҳаси устида ишламоқда.

Ўзини оддий коллекционер эмас, балки «шунчаки  ҳаваскор инсон» деб атайдиган Николайнинг 1990 йилги жаҳон чемпионатидан бошланган бу қизиқиши бугунга келиб икки хонадонга жойлашган  улкан тарихий архивга айланди.

Коллекцияда нималар бор?

Ноёб альбомлар ва стикерлардан тортиб 1970 йиллардан бошлаб чиқарилган афсонавий Panini тўпламларигача. Ҳатто коллекциялари орасида тарихий чипталар — ЖЧ-1970 ва Олимпиада-1980 ўйинлари, шунингдек, 1994 йилги ЖЧ финалининг 475 долларлик асл чиптаси,

эксклюзив либослар, афсонавий спортчилар (Фил Эспозито, Владислав Третьяк) дастхати туширилган свитерлар ва еврокубок учрашувларининг ноёб қайдномалари (программалари) ҳам жой олган. Таъкидлаш жоизки, коллекция фақат футбол тарихи эмас, балки хоккей спорт тури билан боғлиқ ажойиб хотиралар билан ҳам бойитилган.

Спорт коллекционерлари оламида баъзан биргина қоғоз парчаси бутун бошли кўчмас мулк қийматига тенг бўлиши мумкин. Николай Воронеждаги машҳур коллекционерлардан бирининг вафотидан сўнг, унинг уйидан Англия чемпионатининг 1930 йилларга оид ноёб дастурларини қўлга киритади. Ўша пайтда марҳумнинг жами 15 минг нусхадан иборат тўплами қарийб 6 миллион рублга (200 000 доллар атрофида) баҳоланган эди. Николай коллекционернинг турмуш ўртоғидан ўзига керакли футбол дастурлари нусхаларини  400 долларга сотиб олади. Унинг таъкидлашича, бу шунчаки харид эмас, балки ўз коллекциясининг қиймати ва мақомини кескин оширган энг муваффақиятли инвестициялардан бири бўлган.

Биз учун энг диққатга сазовор жиҳати

Николайнинг собиқ Иттифоқ даврига оид архив материаллари ва 1991 йилги сўнгги СССР чемпионати тақвим-календарлари орасида юртимиз фахри — «Пахтакор» жамоаси аъзолари суратлари туширилган ноёб календарь ҳам сақланиб қолган.

Футболга бўлган бундай чексиз муҳаббат ва фидойилик бизнинг мухлисларга ҳам бегона эмас. Яқиндагина ўзбекистонлик футбол ишқибозлари Колумбиядаги ўйинда терма жамоамизни бевосита стадиондан қўллаб-қувватлаш учун ҳатто АҚШ орқали виза олишдек мураккаб йўлларни босиб ўтишди.

Хўш, орамизда ҳам мана шундай катта тарихни, ўзбек футболининг ноёб ашёлари, эски чипталари ва расмий дастурномаларини (программаларини) йиллар давомида уйида асраб келаётган фидойи коллекционерлар бормикан?

Барно Султонова тайёрлади