Қирғизистон президенти Сооронбай Жээнбеков Бишкекда бошланган тартибсизликларга муносабат билдирди. Президентнинг матбуот котиби Толғонай Стамалиева ОАВга давлат раҳбарининг сўзларини етказган.

«Қирғизистон президенти Сооронбай Жээнбеков вазиятни назорат қилмоқда. У барча сиёсий кучларни мамлакат манфаатларини ўз манфаатларидан устун қўйишга, жамиятда бўлинишлар ва фуқароларини хавотирга соладиган бошқа ишларга йўл қўймаслигига чақирмоқда. Барча ҳаракатлар қонуний йўл билан амалга оширилиши зарур», - деган Толғонай Стамалиева. - Мавжуд вазиятни инобатга олган ҳолда, давлат раҳбари Марказий сайлов комиссиясига қонун бузилиши билан боғлиқ материалларни, парламент сайловлари натижаларини бекор қилишгача диққат билан ўрганишни тавсия қилади».

Жээнбеков барча сиёсий кучларни эҳтиёткорликка чақирган. Толғонай Стамалиевага кўра, президент ҳозир Бишкекда.

Эслатиб ўтамиз, 5 октябрь куни парламент сайловлари якунлангач, Қирғизистонда намойишлар бошланди. Жумладан, мухолифлар собиқ президент Алмазбек Атамбаев ва собиқ бош вазир Сапар Исаковни қамоқдан чиқаришган.