Саудия Арабистони ҳеч қанақасига Жўлон тепаликлари бўйича Сурия суверенитетига даҳл қилинишига рози бўлмайди. Бу ҳақида мамлакат қироли Салмон бин Абдул Азиз Ал Сауд баёнот бериб ўтди.

Тунисда бўлиб ўтаётган Араб давлатлари Лигаси йиғилишида Саудия Арабистони қироли чиқиш қилди ва Иордан дарёсининг ғарбий қирғоғи ва Ғазо секторида Фаластин давлати ташкил этилиши борасида ўз позициясида муқим турганини билдирди. Ушбу давлат пойтахти шарқий Қуддус бўлиши лозимлиги айтилган.

Саудия Арабистони ўтган ҳафта давомида АҚШнинг Жўлон тепаликларини Исроилга тегишли экани тўғрисида қилган баёнотини қоралаб чиққан эди. Араб давлатлари Лигаси саммити АҚШнинг Жўлон тепаликлари бўйича қилган баёнотига катта эътибор қаратади.

Эслатиб ўтамиз, АҚШ президенти Доналд Трамп 25 март санасида Жўлон тепаликлари Исроилга тегишлилиги тўғрисида декларацияга имзо чеккан эди.

Жўлон тепаликлари 1967 йилга қадар Сурияга тегишли бўлган. Ўша йили бўлиб ўтган олти кунлик урушдан сўнг Исроил тепаликларнинг учдан икки қисмини босиб олди. 1981 йилнинг декабрида Исроил парламенти мамлакат қонунчилигини Жўлон тепаликларига жорий этиш борасида қонун қабул қилган.

Аммо БМТ томонидан ушбу қарор қабул қилинмаган. БМТ бош ассамблеяси бир неча бор Исроилнинг аннексиясини қоралаган ва Жўлон тепаликларини Сурияга қайтаришга чақирган эди.