Коронавирусга қарши вакцинанинг биринчи дозасини олган Покистон Президенти Aриф Aлви COVID-19 билан касалланиб қолганлигини маълум қилди.

«Менинг тест натижаларим мусбат чиқди. Aллоҳ барча COVID-19 беморларини авф этсин. Вакцинанинг биринчи дозаси бўлган, аммо антитанача иккинчи дозадан сўнг ривожлана бошлайди, бу бир ҳафта ўтиб амалга оширилиши керак эди. Илтимос, эҳтиёткорликни давом эттиринг», — деб ёзади президент «Twitter»да.

Аввалроқ вакцинанинг биринчи дозасини олган Покистон Бош вазири Имрон Хон ҳам коронавирусга чалинганди.

Мамлакатда коронавирусга қарши вакцинация 3 февраль куни Хитойдан 500 минг доза Sinopharm вакцинасини олгандан икки кун ўтиб бошланди. Ушбу препарат 79,3% самарали бўлиб, фаол бўлмаган вирусга асосланган. У 16 мамлакатда тасдиқланган.

Покистон дориларни назорат қилиш бошқармаси январь ойида Sinopharm вакцинасидан фавқулодда фойдаланишга рухсат берди. Ушбу вакцинадан ташқари Покистонда AstraZeneca, Россиянинг «Спутник V» ва Хитойнинг CanSino Biologics компанияси вакциналаридан фойдаланиш маъқулланган.

Покистон Соғлиқни сақлаш вазирлигининг сўнгги маълумотларига кўра, мамлакатда 659 мингдан ортиқ коронавирус касаллиги қайд этилган, 598 мингдан ортиқ одам соғайган, 14,2 минг киши вафот этган.