Наманган вилоятининг Чуст туманида 21 октябрь куни икки киши овқатдан заҳарланишдан ҳалок бўлди, олти киши касалхонанинг жонлантириш бўлимига, ўттиз нафари касалхонага ётқизилди. Бу ҳақда «Анҳор» хабар бермоқда.

Маҳаллий аҳоли вакилининг сўзларига кўра, бозор ёнида жойлашган ошхонага кирган ўттиздан зиёд хўранда касалхонанинг юқумли касалликлар бўлинмасига ётқизилган.

«Бозорнинг ёнида гўшт расталари ва ошхоналар мавжуд. Айтишларича, шу ерда кабоб еганларнинг барчаси касалхонага ётқизилган. Ўтган якшанба куни туман касалхонаси беморлар билан тўлди. Оммавий заҳарланиш кузатилган кун бозорга яқин бўлган барча ошхоналар ёпилди. Ҳозир текширишлар кетмоқда», — дейди Чуст туманида яшовчи фуқаролардан бири.

«Аҳволи оғир бўлган олти киши жонлантириш бўлимида ётибди. Ўттизга яқин одам юқумли касалликлар шифохонасига ётқизилган», — деган шифокорлардан бири. Шунингдек у Наманган ва Тошкентдан мутахассислар чақирилганини қайд этган.

Чуст тумани санитария-эпидемиология назорати маркази бош шифокори Зайлиддин Анарқулов беморларга ичак иерсиниози (юқумли касаллик) ташхиси қўйилганини маълум қилган.