2026/2027-ўқув йили учун давлат олий ва касбий таълим муассасаларига кириш учун тест синовлари 14-23 июл кунлари бўлиб ўтади. Бу ҳақда Билим ва малакаларни баҳолаш агентлиги маълум қилди.

Қайд этилишича, тест синовлари 10 кун давомида кунига икки сменада ташкил этилади. Биринчи смена соат 08:00, иккинчи смена эса 15:00 да бошланади. Абитуриентлардан белгиланган ҳудудга тест бошланишидан камида 1,5 соат олдин етиб келишлари сўралган.

Маълум қилинишича, тест синовларида иштирок этиш учун «Абитуриент рухсатномаси» my.uzbmb.uz сайти орқали берилмоқда. Абитуриентларга рухсатномани юклаб олиб, чоп этиш тавсия этилган.

Ҳар бир абитуриент рухсатномада кўрсатилган манзил, сана ва сменада тест топширади. Бошқа ҳудуд, кун ёки сменада тест синовларида иштирок этишга рухсат берилмайди.

Агентлик абитуриентлар тест синовига паспорт ёки ID-карта ҳамда рухсатнома билан келиши шартлигини эслатди. Паспорт нусхаси ёки бошқа ҳужжатлар билан келган, шунингдек, кечиккан абитуриентлар тест синовларига киритилмайди.