Осиё футбол конфедерацияси (ОФК) эркаклар клублари ўртасидаги мусобақаларнинг 2025/2026 йилги мавсум оралиғидаги янгиланган рейтингини эълон қилди.

Унга кўра, Ўзбекистон илк бор кучли ўнликдан жой олди ва Австралия билан тенглашиб олди (ҳар иккисида — 46,6 балл).

Қитъа рейтингида кучли ўнликка кириш шунчаки рақам эмас, балки мамлакат клубларининг халқаро майдондаги рақобатбардошлиги кўрсаткичидир. Бу натижа келгуси мавсумларда Ўзбекистон клублари учун Осиё Чемпионлар лигаси (Элита ва ОЧЛ-2) мусобақаларида квоталар сонининг ошишига хизмат қилиши мумкин.

Рейтингнинг юқори ўнлиги:

1. Саудия Арабистони — 122 балл
2. Япония — 109 балл
3. Жанубий Корея — 85,5 балл
4. БАА — 74,2 балл
5. Эрон — 68,9 балл
6. Қатар — 64,5 балл
7. Таиланд — 58,7 балл
8. Хитой — 49,4 балл
9. Австралия — 46,6 балл
10. Ўзбекистон — 46,6 балл

Марказий Осиё давлатлари орасида Ўзбекистон пешқадамлик қилмоқда. Қўшниларимиздан Туркманистон 19-ўринда (25,8 балл), Тожикистон 23-ўринда (21,6 балл) ҳамда Қирғизистон 26-ўринда (19,3 балл) қайд этилган.