Osiyo futbol konfederatsiyasi (OFK) erkaklar klublari o‘rtasidagi musobaqalarning 2025/2026-yilgi mavsum oralig‘idagi yangilangan reytingini e’lon qildi.

Unga ko‘ra, O‘zbekiston ilk bor kuchli o‘nlikdan joy oldi va Avstraliya bilan tenglashib oldi (har ikkisida — 46,6 ball).

Qit’a reytingida kuchli o‘nlikka kirish shunchaki raqam emas, balki mamlakat klublarining xalqaro maydondagi raqobatbardoshligi ko‘rsatkichidir. Bu natija kelgusi mavsumlarda O‘zbekiston klublari uchun Osiyo Chempionlar ligasi (Elita va OChL-2) musobaqalarida kvotalar sonining oshishiga xizmat qilishi mumkin.

Reytingning yuqori o‘nligi:

1. Saudiya Arabistoni — 122 ball
2. Yaponiya — 109 ball
3. Janubiy Koreya — 85,5 ball
4. BAA — 74,2 ball
5. Eron — 68,9 ball
6. Qatar — 64,5 ball
7. Tailand — 58,7 ball
8. Xitoy — 49,4 ball
9. Avstraliya — 46,6 ball
10. O‘zbekiston — 46,6 ball

Markaziy Osiyo davlatlari orasida O‘zbekiston peshqadamlik qilmoqda. Qo‘shnilarimizdan Turkmaniston 19-o‘rinda (25,8 ball), Tojikiston 23-o‘rinda (21,6 ball) hamda Qirg‘iziston 26-o‘rinda (19,3 ball) qayd etilgan.