2026 йилнинг январ-март ойларида Ўзбекистонда саноат ишлаб чиқариши таркибида энг катта улуш ишлаб чиқариш саноати ҳиссасига тўғри келди. Миллий статистика қўмитасига кўра, тармоқ ҳажми 246,1 трлн сўмни ташкил этган.

Қайд этилишича, мазкур йўналишда ўтган йилнинг мос даврига нисбатан 9,1 фоизлик ўсиш кузатилган. Бу мамлакатда саноат маҳсулотларига талаб ва ишлаб чиқариш қувватлари кенгайиб бораётганини кўрсатади.

Тоғ-кон саноати ва очиқ конларни ишлаш соҳасида ҳам ижобий динамика сақланди. Биринчи чорак якунларига кўра, тармоқ ҳажми 20,3 трлн сўмга етган ва 4,1 фоиз ўсиш қайд этилган.

Электр энергияси, газ, буғ билан таъминлаш ҳамда ҳавони кондициялаш соҳасида хизмат ва ишлаб чиқариш ҳажми 21,3 трлн сўмни ташкил қилди.

Ушбу тармоқда ўсиш суръати 3,1 фоиз бўлган. Бу иқтисодиёт тармоқларида энергия истеъмоли ортиши ва инфратузилма лойиҳалари таъсир қилаётгани билан изоҳланмоқда.

Сув билан таъминлаш, канализация тизими, чиқиндиларни йиғиш ва қайта ишлаш соҳасида эса 1,6 трлн сўмлик ҳажм қайд этилди. Бу йўналишда ўсиш суръати 8,5 фоизни ташкил қилди.