Кўпчиликка Пекин карами сифатида таниш бўлган сабзавот нафақат ошхонадаги мазали егулик, балки биоактив моддаларга бой, аёллар саломатлиги ва гўзаллиги учун ниҳоятда муҳим бўлган табиий восита ҳисобланади.

Хитой карами паст калорияли бўлишига қарамай, юқори нутритив зичликка эга. Таркибидаги озиқ-овқат толалари ичак перисталтикасини яхшилайди. Бу «шлак»ларни организмдан тезроқ чиқариб юборилишига ва ичак микрофлорасининг соғлом мувозанатига хизмат қилади.

Юқори калий миқдори эса ҳужайралараро сув алмашинувини меъёрлаштиради. Бу эса лимфатик тизимнинг ишлашини яхшилаб, эрталабки шишларни камайтиришга ёрдам беради.

Хитой карами тери саломатлиги учун муҳим бўлган бир нечта омилни ўзида мужассам этади. Жумладан, аскорбин кислотаси коллаген синтези учун энг муҳим катализатордир. У терининг таранглигини ушлаб туришга ва эпидермис тўқималарини эркин радикаллардан ҳимоя қилишга ёрдам беради.

Карам таркибидаги каротиноидлар ва флавоноидлар фотоқаришни секинлаштиради ва терининг табиий ёрқинлигини тиклайди. Хитой карамидан максимал фойда олиш учун уни қайта ишлаш усули муҳим аҳамиятга эга. Юқори ҳароратда узоқ қайнатиш фойдали витаминларнинг парчаланишига олиб келади.

Хитой карами таркибидаги витаминлар ва минералларни сақлаб қолиш учун уни салат кўринишида истеъмол қилиш энг мақбул йўлдир. Карам баргларини ўткир пичоқ билан эмас, қўлда бўлакларга бўлиб тўғраш оксидланиш жараёнини секинлаштиради.

Салатга зайтун ёғи ва лимон шарбати қўшиш ҳам ниҳоятда фойдали бўлиб, зайтун ёғидаги тўйинмаган ёғ кислоталари карам таркибидаги ёғда эрувчи витаминлар (А, К) сўрилишини бир неча баробар оширади. Лимон шарбати эса C витаминини барқарорлаштиради.

Хитой карами — бу шунчаки парҳезбоп маҳсулот эмас, балки организмни ичкаридан тозаловчи ва терини ташқаридан ёшартувчи функционал озиқ-овқатдир. Уни кунлик рационга, айниқса кечки овқатга енгил салат сифатида киритиш, 7-10 кун ичида танадаги енгилликни ва юз терисидаги ўзгаришларни кузатиш имконини беради.

Ҳар қандай диетани бошлашдан олдин, агар сизда ошқозон-ичак тизими билан боғлиқ сурункали касалликлар бўлса, шифокор билан маслаҳатлашишингиз тавсия этилади. Гап исботи билан бўлсин, деб қуйида кечки овқат учун ноодатий таом рецептини тақдим этамиз. ​Бу рецепт карамга гўштли таомлардек тўйимли тус беради. 

Кунжутли соусда қовурилган Хитой карами:

​Керакли масаллиқлар:

1 та ўртача катталикдаги карам.

​Соус учун: 2 ош қошиқ соя соуси, 1 ош қошиқ кунжут ёғи, 1 чой қошиқ асал (ёки қиём), яримта лимон шарбати, 1 бўлак майдаланган саримсоқпиёз ва бироз майдаланган имбир (занжабил).

​Безак учун: Қовурилган кунжут уруғлари ва майда тўғралган яшил пиёз.

​Тайёрланиш жараёни:

Карамни илдиз қисми билан бирга узунасига 4 бўлакка бўлинг (илдизини кесиб ташламанг, чунки у карамнинг шаклини стейкдек ушлаб туриши учун керак).

​Маринадлаш: Юқоридаги соус масаллиқларини идишда яхшилаб аралаштиринг. Карам бўлакларини ушбу соус билан ҳар томонлама яхшилаб суртиб чиқинг.

Товани (иложи бўлса грил това) яхшилаб қиздиринг. Бироз зайтун ёғи суртинг ва карам бўлакларини икки томонидан ўрта оловда 3-4 дақиқадан қовуринг.

​Карамнинг четлари енгил қорайган, ичи эса бироз қирсилдоқ ҳолатда бўлиши лозим.

Тайёр бўлган карам стейкларини лаганга солиб, устидан қолган соусдан қуйинг ва кунжут ҳамда кўкатлар билан безатинг.

Ёғ жуда кам ишлатилгани, кунжут ёғи ва имбир организмда метаболизмни янада тезлаштиргани боис бу таомни парҳез пайтида ўзингизни чекламасдан, ресторан даражасидаги таъмдан баҳраманд бўлиш учун тайёрлаб кўринг!