Жорий йилнинг 10 май куни Тошкент шаҳрида кучли ёғингарчилик натижасида шаҳарнинг 8 та туманидаги 23 та манзилдан сув тўпланиши ҳолатлари бўйича мурожаатлар келиб тушди. Бу ҳақда пойтахт ҳокимлиги хабар бермоқда.

Тегишли хизматлар маълумотига кўра, шу куни ёғингарчилик миқдори 35 мм ни ташкил этган. Бу миқдорнинг асосий қисми икки соатдан камроқ вақт ичида ёғган бўлиб, ўртача ойлик ёғингарчилик меъёрининг ярмидан кўпроғини ташкил этади.

Маълум қилинишича, Тошкентдаги мавжуд ёмғир сувларини оқизиш тизими бир кеча-кундузда 20 мм гача ёғингарчиликни қабул қилишга мўлжалланган. Ишлаб чиқилган бош режага мувофиқ, тизимнинг ўтказувчанлик қувватини бир кеча-кундузда 36 мм гача босқичма-босқич ошириш кўзда тутилган.

Шундай қилиб, энг кучли ёмғир пайтида шаҳар сув оқизиш инфратузилмаси бош режада назарда тутилган истиқболдаги ҳисоб-китоб параметрларига яқин бўлган кескин ва қисқа муддатли юкламага дуч келди.

Айрим нуқталарда келаётган сув ҳажми бир вақтнинг ўзида мавжуд ирригация тармоқлари ва қувурларнинг ўтказувчанлик қувватидан ошиб кетган. Натижада бир қатор ҳудудларда ёмғир суви тўпланиб қолган.

Бундан ташқари, айрим жойларда маҳаллий омиллар: сув оқизиш элементларига чиқиндилар тиқилиб қолиши, ўзбошимчалик билан қурилган иншоотлар, ариқ ва ирригация тизимларининг автотураргоҳ ёки бошқа хўжалик эҳтиёжлари учун тўсиб қўйилиши кабилар вазиятни янада мураккаблаштирган.

Оқибатларни зудлик билан бартараф этиш учун Фавқулодда вазиятлар вазирлиги, дренаж-коллектор тизимлари, каналлар, коммунал хизматлар ва бошқа тегишли ташкилотларнинг мутахассислари ҳамда бригадалари жалб этилиб, жойларда 60 дан ортиқ махсус техника ишлаган.

Кўрилган чоралар натижасида сув тўпланиши оқибатлари бир соат ичида тўлиқ бартараф этилган.

Ҳокимиятнинг маълум қилишича, ҳар бир манзил бўйича ишчи гуруҳлар томонидан вазият бирламчи тарзда ўрганилиб, зарур чоралар белгиланди. Хусусан, қуйидагилар кўриб чиқилмоқда:

• 5 та манзилда ирригация тизимини қуриш;
• битта ҳудудни лойиҳачилар билан биргаликда қайта ўрганиб чиқиш;
• қўшимча 3 та дюкер (сув ёки йўллар остидан ўтувчи қувур — таҳр.) ўрнатиш;
• битта объектда диаметри 800 мм бўлган, бошқа бир қатор ҳудудларда эса диаметри 500 мм бўлган қувурларни ўрнатиш;
• қўшимча насос агрегатларини ўрнатиш ва сув чиқариш қувватини ошириш;
• 6 та қўшимча сув қабул қилиш панжарасини монтаж қилиш;
• тизимнинг айрим қисмлари ўтказувчанлик қувватини кучайтириш.

Таъкидланишича, асосий эътибор ёмғир сувларини чиқариш тизимини босқичма-босқич модернизация қилиш, муаммоли ҳудудларнинг ўтказувчанлик қувватини ошириш ва келгусида локал сув тошиши хавфини камайтиришга қаратилади.