Quacquarelli Symonds (QS) халқаро рейтинг агентлигининг Англияда чоп этиладиган «QS Global Education News» хабарномасида «TIIAME only Uzbek institution represented in QS EECA rankings (ТИҚХММИ —QS EECA рейтингидан жой олган Ўзбекистоннинг ягона институти)» сарлавҳаси остида Тошкент ирригация ва қишлоқ хўжалигини механизациялаш муҳандислари институтининг эришаётган натижалари тўғрисида мақола чоп этилди. Бу ҳақда институт матбуот хизмати раҳбари Р.Жуманиёзов хабар бермоқда.

Мана иккинчи йилдирки, Тошкент ирригация ва қишлоқ хўжалигини механизациялаш муҳандислари институти дунё университетлари рейтингларини баҳоловчи халқаро рейтинг агентликлари эътирофида. 2019 йилда эришилган юқори натижа Ўзбек ОТМлари тарихида Quacquarelli Symonds (QS) халқаро рейтинг агентлигининг Ривожланаётган Европа ва Марказий Осиё давлатлари рейтингида 301-350 ўринда қайд этилиши бўлди. Мазкур натижа QS нинг 2020 йилги йиллик ҳисоботи (Yearbook) да акс этган.

Мақолада, ТИҚХММИнинг QS EECA рейтингидаги иштироки, рейтингда 301-350 ўринда қайд этилиши тўғрисида, институтда ёшларга яратилган глобал стандартлар асосидаги юқори сифатли таълим, илмий ҳамда академик ишлар олиб бориш учун тўлиқ жиҳозланган лабораториялар ёшларни интеллектуал қобилиятларини рўёбга чиқариб, уларнинг келажакда ўз соҳаларининг профессионаллари бўлиб етишишлари учун яратилган шароитлар тўғрисида гап кетар экан, институт ректори, Республика Олий таълим кенгашининг раиси Умурзаков Ўктам Пардаевичнинг «пандемия шароитида таълим беришни бир дақиқага ҳам тўхтатмадик» деган сўзлари келтириб ўтилган.

Айтиш жоизки, QS-GEN (Global Education News) хабарномаси, шу кунгача чоп этилиб келинаётган QS WOWNEWS журналининг мантиқий давоми бўлиб, август ойида ўзининг биринчи сонини нашрдан чиқарди. Хабарнома ўз ичига дунё ОТМлар янгиликлари, шу жумладан, талабалар ва профессор-ўқитувчиларнинг ютуқлари, дастур ишланмалари, илмий ютуқлар, инновациялар, халқаро ҳамкорлик ва ҳамкорлик доирасида тузилган шартномалар, талабалар шаҳарчаси ва ОТМ ҳузуридаги илмий марказ ҳамда лабораторияларнинг очилиши каби муҳим ютуқларни тарғиб қилиб боради.