Prezident sovrini uchun «Ilg‘or muhandislik maktabi» milliy tanlovi o‘tkaziladi. 

Hukumat qarori (300-son, 11.06.2026-y.) bilan «O‘zbekiston Respublikasi Prezidenti sovrini uchun «Ilg‘or muhandislik maktabi» milliy tanlovini tashkil etish va o‘tkazish tartibi to‘g‘risida)»gi nizom tasdiqlandi.

Mazkur Nizom davlat umumiy o‘rta ta’lim tashkilotlari o‘rtasida «Ilg‘or muhandislik maktabi» milliy tanlovini tashkil etish tartibini belgilaydi.

Tanlovda ishtirok etish istagini bildirgan maktablar har yili 1-yanvardan 1-fevralga qadar maxsus platformada ro‘yxatdan o‘tadi hamda maktab terma jamoasi tarkibini belgilaydi.

 Tanlov 3 bosqichda o‘tkaziladi:

- tuman bosqichi – har yili 1-aprelgacha tumandagi maktab terma jamoalari o‘rtasida;

- hududiy bosqich– har yili 1-iyulgacha tuman bosqichida 1-o‘rinni qo‘lga kiritib, g‘olib bo‘lgan maktab terma jamoalari o‘rtasida;

- respublika bosqichi – har yili 1-oktyabrgacha hududiy bosqichda 1-o‘rinni qo‘lga kiritib, g‘olib bo‘lgan maktab terma jamoalari o‘rtasida.

Tanlov g‘oliblari quyidagi miqdorlarda pul mukofoti bilan mukofotlanadi:

- tuman (shahar) bosqichida 1-o‘rin – BHMning 200 baravari, 2-o‘rin – BHMning 150 baravari, 3-o‘rin – BHMning 100 baravari miqdorida;

 - hududiy bosqichda 1-o‘rin – BHMning 300 baravari, 2-o‘rin – BHMning 250 baravari, 3-o‘rin – BHMning 200 baravari miqdorida;

- respublika bosqichida 1-o‘rin – BHMning 600 baravari, 2-o‘rin – BHMning 450 baravari, 3-o‘rin – BHMning 300 baravari miqdorida.