Kambag‘allikni qisqartirish va bandlik vazirining birinchi o‘rinbosari tayinlandi. Yangi tayinlovga ko‘ra, ushbu lavozimda 2021-yil avgust oyidan AT «Xalq banki» boshqaruv raisining birinchi o‘rinbosari lavozimida ishlab kelgan Zafar Abdumajidovich Azimov ish olib boradi.

Zafar Azimov 1985-yil tug‘ilgan. 2006-yil Toshkent moliya institutining bakalavr bosqichini, 2008-yil ushbu institutning magistratura bosqichini tamomlagan. 2007-2019 yillarda O‘zbekiston Respublikasi Markaziy bankida turli lavozimlarda, xususan, 2018-2019 yillarda «Iqtisodiyotning bazaviy tarmoqlarini moliyalashtirish bo‘yicha tijorat banklari faoliyatini monitoring qilish» departamenti direktori sifatida faoliyat olib borgan. 2019-2021 yillarda «O‘zsanoatqurilishbank» ATB boshqaruvi raisi o‘rinbosari lavozimida ishlagan. 2021-yil avgust oyida Xalq banki boshqaruvi raisining birinchi o‘rinbosari etib tayinlangan.

Eslatib o‘tamiz, joriy yilning sentyabr oyida Kambag‘allikni qisqartirish va bandlik vaziri lavozimiga Botir Zohidov tayinlangan edi.