21 февраль куни Россия президенти Владимир Путин халқаро ҳуқуқ меъёрларига мувофиқ Украинага тегишли бўлган Донецк ва Луганск ҳудудларини алоҳида республика сифатида тан олиш ҳақидаги фармонга имзо чекди.

Туркия президенти Ражаб Тоййиб Эрдўғон буни қабул қилиб бўлмас ҳолат деб атади ва томонларни соғлом тафаккурга қулоқ солиш ва халқаро ҳуқуқ меъёрларини ҳимоя қилишга чақирди.

Аввалроқ Туркия ташқи ишлар вазирлиги ҳам ушбу ҳодиса юзасидан баёнот берган эди.

«Россия Федерациясининг «Донецк ва Луганск деб аталаётган республикаларни тан олиш тўғрисида»ги қарори Минск келишувларига зид, шунингдек, Украинанинг сиёсий бирлиги, суверенитети ва ҳудудий яхлитлигини очиқдан-очиқ бузиш ҳисобланади. Биз Россиянинг бу қарорини номақбул деб атаймиз ва уни рад этамиз», – дейилади баёнотда.

Расмий Анқара яна бир карра Украинанинг сиёсий бирлиги ва ҳудудий яхлитлигини сақлашга содиқлик изҳор этган.

Эслатиб ўтамиз, Туркия Қрим ярим оролининг Россия томонидан аннексия қилинганини ҳам тан олмаган.

Аввал хабар берганимиздек, Украинага тегишли бўлган ҳудудларнинг алоҳида республика сифатида тан олиниши халқаро ҳамжамият томонидан ҳам танқидий қабул қилинди.