Трамп маъмурияти НАТО иттифоқчиларини Эрондаги урушга бўлган муносабатига қараб «яхши» ва «ёмон»га ажратувчи ҳужжат тайёрлади.  Бу ҳақда Politico нашри вазиятдан хабардор бўлган учта европалик дипломат ва битта АҚШ ҳарбий амалдорига таяниб хабар берди. 

НАТО бош котиби Марк Рюттенинг Вашингтонга ташрифи (7-12 апрел) учун тайёрланган ҳужжатда ҳар бир мамлакатнинг иттифоққа қўшган ҳиссаси баён этилган ва уларни уч тоифага ажратилган.

Манбалар қайси давлатлар қайси гуруҳга киритилганини ошкор қилмади. 

Кузатувчиларнинг фикрича, бундай ҳужжатнинг тайёрланишининг ўзи АҚШ президенти Доналд Трампнинг унинг хоҳиш-истакларини тўлиқ бажаришга мойил бўлмаган иттифоқчиларга қарши таҳдидларини амалга ошириш ниятида эканлигидан далолат беради. 

Нашр манбалари ҳужжатда «ёмон» иттифоқчиларга қарши ҳеч қандай ҳаракатлар режаси йўқлигини таъкидладилар. «Уларнинг аниқ ғоялари йўқга ўхшайди... Битта вариант ўша давлатдан Америка қўшинларни олиб чиқишдир, аммо бу АҚШнинг ўзи учун кўпроқ жазо бўларди, шундай эмасми?», деб таъкидлади бир европалик дипломат. 

Оқ уй бундай ҳужжатнинг мавжудлигини амалда тасдиқлади.

«Қўшма Штатлар ҳар доим ўзларини иттифоқчилар деб атайдиган давлатларга ёрдам беришга тайёр бўлса-да, биз минглаб қўшинлар билан ҳимоя қилаётган мамлакатлар Эрондаги операцияда бизга ёрдам беришдан воз кечишди. Президент Трамп бу адолатсиз динамика ҳақида нима деб ўйлашини аниқ айтди. Унинг сўзларига кўра, Қўшма Штатлар ҳамма нарсани эслаб қолади», деди Оқ Уй вакили Анна Келли нашрга.

НАТО Politico нашрининг изоҳ бериш ҳақидаги илтимосига жавоб бермади.