АҚШ Венесуэла президенти Николас Мадуро лавозимидан кетган тақдирда махсус режа устида ишламоқда. Бу ҳақда Пентагон матбуот котиби Кингсли Уилсон журналистларга маълум қилган. 

Унинг сўзларига кўра, Уруш департаменти (Пентагон) ҳар қандай вазият учун режага эга.

"Биз режалаштирувчи ташкилотмиз. Агар дунёнинг исталган нуқтасида бирон бир воқеа содир бўлса, бизда аллақачон жавоб режаси ишлаб чиқилган бўлади ва чоралар кўрилади", деди Уилсон Мадуро истеъфога чиққан тақдирда Пентагоннинг Венесуэладаги роли ҳақидаги саволга жавоб бериб. Расмий АҚШнинг ушбу режаси бўйича тафсилотларга изоҳ бермаган. Эслатиб ўтамиз, АҚШ Венесуэлада Мадурога қарши бўлган мухолифатни қўллаб келади. 

Ўтган ҳафта CNN телеканалининг хабар беришича, Венесуэла президенти АҚШ вакиллари билан норасмий музокаралар чоғида истеъфога чиқишга тайёрлигини, лекин камида 18 ойдан кейин бу ишни амалга оширишини айтган. 

30 ноябрь куни АҚШ президенти Доналд Трамп Мадуро истеъфога чиқмаса, кескин чора кўриши мумкинлиги ҳақида хабарлар тарқалганди. Трамп аввалроқ Венесуэла ва унинг атрофидаги ҳудудлар устидаги ҳаво ҳудуди ёпилишини эълон қилган эди. Бу хабар Америка ҳарбийлари Кариб ҳавзасида фаоллашган пайтда эълон қилинди.