Россия президенти Владимир Путинга хавфсизлик гарови эвазига ҳокимиятдан кетиш таклифи берилиши мумкин, деб ҳисоблайди мамлакат собиқ бош вазири, мухолифатдаги сиёсатчи Михаил Касьянов.

М.Касьяновнинг украиналик журналист Дмитрий Гордон билан суҳбатда таъкидлашича, Путинга бундай таклиф берилиши элга дастурхон қилинмайди, албатта, аммо парда ортида шу руҳда музокаралар кечиши эҳтимоли мавжуд.

«Ўйлайманки, унга шундай таклиф билан мурожаат қилинади. Бу унинг ҳокимиятдан кетиши, Россияда бошқарув тизими ўзгариши омили бўлади. Бунинг учун эса Путин кетиши керак. У кетиши учун эса кафолат таклифи берилиши лозим», – дейди мухолиф сиёсатчи. 

Собиқ бош вазирга кўра, Хитой Путинни ўз ҳимоясига олиши ва унинг хавфсизлигини кафолатлаши мумкин бўлган ягона давлатдир.

В.Путин Россияни 2000 йилдан бери идора этиб келади (2008-2012 йилларда у бош вазир лавозимида олий бошқарувда қатнашган). 2018 йилда у тўртинчи муддатга президент сифатида сайланди. 2020 йилда мамлакат қонунчилигига киритилган ўзгартиришларга мувофиқ, В.Путин 2036 йилга қадар давлат раҳбари лавозимида қолиши мумкин.

Сўнгги вақтларда айрим таҳлилчилар Украинадаги мағлубият ва муваффақиятсиз ҳарбий юриш ортидан Россияда ҳокимият алмашуви рўй бериши ҳақида ёзмоқда. Баъзи экспертлар эса Путин аллақачон мутлақ ҳокимиятни бой бера бошлагани ҳақидаги фаразни илгари сурмоқда.

Яна айрим нашрлар Россия президентининг оғир касал эканини иддао қилиб, «хотима яқин» эканидан баҳс этмоқда.

М.Касьяновнинг ўзи аввалроқ Кремль хўжайини сиёсий реалликдан узилиб қолгани, шу важдан ақл бовар қилмас ишларга қўл ураётганини айтган эди.

Кеча, 10 ноябрь куни Bloomberg ҳам Путиннинг Украинада ғалаба қозониш имконияти тугагани ҳақида ёзди. Нашрга кўра, рус армиясининг Украина жанубидаги Херсон шаҳридан чекиниши катта муваффақиятсизлик ҳисобланади. Россия раҳбарининг келгуси ҳафта Индонезияда бўлиб ўтадиган G20 саммитига бормаслик қарори эса унинг халқаро майдондаги нуфузи пасайиб бораётганидан далолат беради.