Трамп Си Цзинпин ва Путиннинг учрашувига муносабат билдирди. 

АҚШ президенти Доналд Трамп Россия президенти Владимир Путин ва Хитой етакчиси Си Цзинпин ўртасидаги музокараларни олқишлади. Трамп иккала ҳамкасби билан ҳам «яхши муносабатлар ўрнатганини» таъкидлади. 

«Менимча, бу яхши. Иккала раҳбар билан ҳам ажойиб мулоқотдаман», деди Америка президенти. У «ҳамма билан» яхши чиқишишига ишонч билдирди.

Эслатиб ўтамиз, Россия президенти Владимир Путин ва Хитой раиси Си Цзинпин Пекин шаҳрида учрашув ўтказиб, икки давлат ўртасидаги стратегик ҳамкорлик ва халқаро кун тартибидаги масалаларни муҳокама қилди.

Музокаралар аввалида Путин Россия ва Хитой муносабатлари «мисли кўрилмаган даражада юқори босқичга» чиққанини таъкидлаб, уларни «ҳақиқий ҳар томонлама шериклик намунаси»  деб атади. 

Путиндан аввал Доналд Трамп 13-15 май кунлари мамлакатга ташриф буюрган. Бу Америка президентининг 2017 йилдан бери Хитойга биринчи ташрифи эди.