Россия ҳарбийлари тун давомида Украина ҳудудига ракета ва дронлардан фойдаланган ҳолда оммавий ҳужум уюштирди. Жами ўндан ортиқ ҳудуд зарба остида қолди. Украина Қуролли Кучлари Ҳаво кучлари маълумотига кўра, ҳужумда турли хилдаги 635 та учувчисиз учиш аппарати, Х-101 ва «Искандер-К» туридаги 35 та қанотли ракета, шунингдек учта «Кинжал» ракета қўлланган. Мамлакат бўйлаб 30 та тўғридан-тўғри зарба қайд этилган.

Ҳужумнинг асосий нишонларидан бири энергетика тизими бўлган. Украина Энергетика вазирлиги маълум қилишича, бу 2025 йил бошидан бери энергетика инфратузилмасига қилинган тўққизинчи йирик ҳужум ҳисобланади.

Украина Бош вазири Юлия Свириденконинг айтишича, энг катта зарар мамлакатнинг ғарбий вилоятларидаги энергетика объектларига етган.

Маълумотларга кўра, ҳужум оқибатида Ровно, Тернополь ва Хмельницкий вилоятлари деярли тўлиқ электр таъминотисиз қолган. Винница, Одесса, Чернигов, Житомир, Донецк, Днепропетровск ва Харьков вилоятларида эса электр энергияси қисман ўчирилган. Ҳатто ҳужумдан бевосита зарар кўрмаган ҳудудларда ҳам режадан ташқари электр узилишлари жорий этилган.

Ҳудудий ҳокимиятлар ҳисоботларига кўра, ҳужум натижасида камида уч киши ҳалок бўлган. 15 нафарга яқин киши жабрланган.

Зеленский ҳужум муносабати билан халқаро ҳамжамиятни Россияга нисбатан босимни кучайтиришга чақирди.

«Бу ҳужум Россиянинг устувор мақсадларини очиқ-ойдин кўрсатади. Рождество арафасида, одамлар уйида, яқинлари билан хавфсиз ҳолда бўлишни истаган пайтда ҳужум қилинди. Бу, аслида, урушни тугатиш учун олиб борилаётган музокаралар қизғин палласида уюштирилди», – деди Зеленский.

Россия Мудофаа вазирлиги оммавий ҳаво ҳужуми ўтказилганини тасдиқлади. Вазирлик версиясига кўра, бу «юқори аниқликдаги қуроллар билан берилган зарба» бўлиб, унинг нишонлари ҳарбий-саноат мажмуаси корхоналари ва улар фаолиятини таъминловчи энергетика объектлари бўлган.

Декабрь ойи бошидан бу энергетика тизимини нишонга олган камида тўртинчи йирик ҳужумдир. 6 декабрь куни олти ҳудуд, 13 декабрда тўққиз ҳудуд зарбага учраган. 18 декабрь куни эса беш вилоятга ҳужум қилиниб, натижада 180 мингдан ортиқ хонадон электр таъминотисиз қолганди.