АҚШ президенти Дональд Трамп Венесуэладаги ҳарбий амалиётдан кейин Эрон ҳамда Гренландияни нишонга олиши мумкин, деб ҳисоблайди Буюк Британиянинг The Guardian газетаси.

“Венесуэлада бир кечада рўй берган ҳодисадан кейин Трамп кескин ҳаракатлар кўришга тайёр эканини маълум қилган Эрон ва Дания каби ҳукуматлар ташвишга тушиши керак”, – деб ёзди инглиз нашри.

Қайд этилишича, тобора кексайиб бораётган ва доимий равишда оммага манзур бўлишни кўзлаган Трамп ҳарбий амалиётга зўр бермоқда.

АҚШ раҳбарининг ташқи сиёсатдаги радикал қадамлари болалар савдоси ва фаҳшга оид шов-шувли “Эпштейн иши”дан жамоатчилик эътиборини чалғитиш усули ўлароқ талқин этилган.

“Трамп дунёга XXI аср қуролларига эга XIX империалисти нигоҳи билан қарайди”, – деб хулоса қилган The Guardian.

Трамп илк президентлик муддатидаёқ Данияга қараши Гренландияни аннексия қилиш истагини билдирган эди. Республикачининг фикрича, бу миллий ва халқаро хавфсизлик манфаатлари билан боғлиқ. Гренландия ҳам, Дания ҳам бу даъволарни қатъиян рад этади.

Куни кеча Оқ уй маъмурияти раҳбари муовини Стивен Миллернинг рафиқаси ижтимоий тармоқда АҚШ байроғи рангларида бўялган Гренландия харитасини чоп этгани ва унга қисқача “Тез орада” деган изоҳни илова қилгани ҳам Вашингтоннинг навбатдаги эҳтимолий босқинига ишора ўлароқ кўрилди.

Дания расмийлари бу ҳаракатни кескин танқид қилиб, Қиролликнинг ҳудудий яхлитлигига ҳурмат билан муносабатда бўлишни талаб қилмоқда.

Хусусан, бош вазир Метте Фредериксен Трампни Гренландиянинг АҚШга қўшилиши ҳақидаги баёнотларни тўхтатишга чақирди.

Хабарингиз бор, айни пайтда Эроннинг ўнлаб шаҳарларида ҳукуматга қарши норозилик намойишлари бўлиб ўтмоқда. Куни кеча Трамп Эрон тинч намойишчиларни шафқатсизларча ўлдира бошласа, АҚШ ҳарбийлари намойишчиларга ёрдам беришини айтди.

Тобора жанговар ташқи сиёсат юритаётган Трамп 3 январь куни бўлиб ўтган матбуот анжуманида Куба, Колумбия ва Мексикага ҳам таҳдид қилган.

“У кокаин ишлаб чиқаради ва АҚШга етказади. У қадамини ўйлаб босгани маъқул”, – деган Трамп Колумбия президенти Густаво Петро ҳақида. Колумбия президенти АҚШнинг Венесуэлага тажовузини кескин қоралагани маълум.

Трамп, шунингдек, Куба ҳам Венесуэла каби оғир аҳволда экани, Мексикани эса президент эмас, наркотўдалар идора этаётганини иддао қилган.

Эслатиб ўтамиз, 3 январга ўтар кечаси АҚШ ҳарбийлари Венесуэла пойтахти Каракас ҳамда мамлакатнинг бошқа ҳудудларига ҳарбий ҳужум уюштирди. Бир неча соатдан кейин Трамп ижтимоий тармоқдаги саҳифаси орқали АҚШ Венесуэладаги объектларга зарба берганини тасдиқлади. Оқ уй раҳбари, шунингдек, Венесуэла президенти Николас Мадуро ва унинг рафиқаси қўлга олиниб, мамлакатдан олиб чиқиб кетилганини билдирди.

Ўзбекистонлик таҳлилчи ва ижтимоий тармоқ фаоллари Трампнинг Венесуэлада амалга оширган ҳаракати халқаро ҳуқуққа зид эканига эътибор қаратмоқда.