Украинада коррупционерларни умрбод қамоқ жазосига ҳукм қилиш таклиф этилди. Бу ҳақда Украина етакчиси Владимир Зеленскийнинг идораси раҳбари маслаҳатчиси Михайло Подоляк ўзининг Телеграм-каналида маълум қилди.

«Мен коррупционерлар фош этилгандан сўнг дарҳол умрбод қамоқ жазосига ҳукм қилинишини истардим. Лекин қонун бор, унга амал қилиш керак», - деди у. Унинг фикрича, айни пайтда Украина «коррупцияга тоқат қилмаслик»ни намойиш этмоқда. Президент даражасида «энг тез ва кескин қарорлар қабул қилинмоқда».

10 ноябр куни Украина Коррупцияга қарши кураш миллий бюроси (НАБУ) энергетика соҳасида коррупцияга қарши кураш бўйича кенг кўламли операция ўтказилишини эълон қилди. Икки кундан кейин Украина ҳукумати мамлакат адлия вазири ва собиқ энергетика вазири Ҳерман Галушченконинг уйида тинтув ўтказганидан сўнг унинг фаолиятини вақтинчалик тўхтатди. Бундан ташқари, Зеленскийнинг яқин ҳамкори сифатида кўрилган тадбиркор Тимур Миндичнинг уйида тинтувлар ўтказилди.

Воқеалар фонида Зеленский энергетика соҳасидаги коррупция можаросига алоқадор бўлган бизнесмен Тимур Миндич ва бош молиячи Александр Цукерманга қарши санкциялар киритди.