Тошкент шаҳри ва Тошкент вилоятида ҳуқуқни муҳофаза қилувчи органлар томонидан ўтказилган кенг кўламли тезкор тадбирлар «қора бозор»нинг яна бир жирканч тармоғини фош қилди. Ёшларнинг ҳаёти ва соғлиғига жиддий таҳдид солувчи, гиёҳвандликка тенглаштирилган кучли таъсир қилувчи дори воситаларини ноқонуний сотиш билан шуғулланган шахслар қўлга олинди.

Тошкент шаҳрида ўтказилган махсус операция давомида муқаддам судланган Р.А. ўз «фаолиятини» яна давом эттиришга уринди. У фуқаро К.К.га (у ҳам муқаддам судланган) миқдори жиҳатидан кичик бўлмаган партияни — 90 дона «Тропикамид» ва 448 дона «Регапен»ни 4 000 АҚШ доллари эвазига сотаётган пайтда ашёвий далиллар билан қўлга олинди. Бу шунчаки олди-сотди эмас, балки юзлаб ёшларнинг тақдирини «савдога қўйиш» эди.

Ҳуқуқ-тартибот органларининг тезкорлиги натижасида Қибрай туманида ҳам ноқонуний муомала тармоғи узилди. Фуқаро А.З. навбатдаги «мижозига» «Тропикамид»ни 1,1 миллион сўмга сотаётган вақтида қўлга олинди. Тинтув жараёнида унинг хонадонидан яна ўнлаб дона «Тропикамид» ва «Регапен» номли кучли таъсир қилувчи дори воситалари ашёвий далил сифатида олинди. Жиноятчи ўз уйини «кучли таъсир қилувчи воситалар омбори»га айлантириб олгани маълум бўлди.

Мазкур ҳолатлар юзасидан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) билан жиноят ишлари қўзғатилди. Ҳозирда тергов ҳаракатлари олиб борилмоқда.

Айбланувчиларни энди нафақат жарима, балки узоқ муддатли озодликдан маҳрум қилиш жазоси кутмоқда. Ҳуқуқни муҳофаза қилувчи идоралар огоҳлантиради: ёшларнинг келажагини заҳарловчи ҳар қандай ноқонуний ҳаракатнинг охири панжара ортида якун топади. «Осон пул» илинжидагилар буни унутмасликлари керак.