Сербиянинг ҳукмрон партияси (Серб прогрессив партияси) мамлакат президенти Александр Вучични бош вазирликка номзод қилиб танлади.

«Бугун сизлардан олган ушбу ишонч мен учун улкан шарафдир. Халқ нима дейишини кўрамиз. Бу катта шараф. Камчиликлар ҳаммада бор, жумладан бизда ҳам етарли. Лекин миллий ва давлат манфаатларимизни биздан кўра аниқроқ, реалроқ, жиддийроқ ва масъулият билан ҳурмат қиладиган ҳамда ҳимоя қиладиган бошқа партия йўқ», — деди Вучич овоз беришдан сўнг.

Сербияда парламентга сайловлар шу йил 25 октябрда ўтказилиши кутилмоқда, яқин кунларда парламент тарқатиб юборилади ва овоз бериш санаси расман белгиланади.

Маълумот учун: Александр Вучич (56 ёшда) — 2017 йилдан буён Сербия президенти. 2026 йил июнида мухолифат исёнларидан сўнг яқин орада истеъфога чиқишини маълум қилганди. 2014–2017 йилларда Сербия бош вазири бўлган.

Эслатиб ўтамиз, Ўзбекистон президенти Шавкат Мирзиёев Сербия президенти Александр Вучичнинг таклифига биноан 7-8 сентябр кунлари расмий ташриф билан ушбу мамлакатда бўлади.