Божхона кодексининг 20-моддасига мувофиқ Божхона органлари божхона чегараси орқали ўтказиш пунктлари тўғрисида, белгиланган тақиқлар ва чекловлар, шунингдек божхона органларининг иш вақти ҳақида ҳаммабоп шаклда ахборот тақдим этиши шарт. 24-моддасида эса миллий қонунчилик ва халқаро шартномаларига мувофиқ айрим товарларни ва (ёки) транспорт воситаларини Ўзбекистон Республикаси ҳудудига олиб кириш ҳамда ушбу ҳудуддан олиб чиқиш тақиқланиши белгиланган.

Бугунги кунда 22 тадан ортиқ норматив-ҳуқуқий ҳужжатлар билан жами 5300 дан ортиқ турдаги (ТИФ ТН коди бўйича) товарларнинг республика ҳудудига олиб кирилиши, ундан олиб чиқилиши ҳамда транзит тартибида ўтишига тақиқ ва чекловлар (рухсатнома) ўрнатилган.

Бироқ, тақиқ ва чекловлар қўйилган товарларнинг реал вақт режимида ягона электрон очиқ реестри шакллантирилмаган.

Натижада, ташқи иқтисодий фаолият билан шуғулланувчи тадбиркорлик субектлари томонидан тақиқланган товарлар тўғрисида ишончли маълумотлар олишда муаммолар юзага келмоқда.

Шу маънода, Инвестициялар, саноат ва савдо вазирлиги Ўзбекистон ҳудудига олиб кириладиган, олиб чиқиладиган ва транзит тартибда ўтувчи товарларга қўйилган тақиқ ва чекловларнинг ягона электрон очиқ реестрини жорий этишга доир Ҳукумат қарори лойиҳасини ишлаб чиқди.

Унга кўра, 2026 йил 1 январдан «Интеграциялашган тариф» интерактив хизмати базасида Ўзбекистон Республикаси ҳудудига олиб кириладиган, олиб чиқиладиган ва транзит тартибда ўтувчи товарларга қўйилган тақиқ ва чекловларни ўз ичига олган Ягона электрон очиқ реестр ахборот хизмати юритилади.

Эслатиб ўтамиз, Вазирлар Маҳкамасининг 2018 йил 16 октябрдаги 829-сон қарори билан «Интеграциялашган тариф» интерактив хизматининг ахборотини ўз вақтида янгилаб бориш ва унинг узлуксиз ишлашини таъминлаш бўйича технологик йўриқнома тасдиқланган.