Андроид қурилмалар учун Xabar.uz мобил иловаси. Юклаб олиш ×

ОАВ: Ботир Парпиевга алоқадор мансабдорлар ишдан олинмоқда

ОАВ: Ботир Парпиевга алоқадор мансабдорлар ишдан олинмоқда

Фото: Давлат солиқ қўмитаси

Андижон вилояти касаба уюшмалари ташкилотлари бирлашмаси раиси Қ.Парпиев ишдан олинган. Бу ҳақда «Kun.uz» хабар тарқатди. Хабар берилишича, Қодир Парпиев Давлат солиқ қўмитаси собиқ раиси Ботир Парпиевнинг укаси ҳисобланади.

Шунингдек, манба хабарига кўра, Андижон шаҳар ички ишлар бўлими бошлиғи, полковник Шуҳрат Парпиев ҳам ишдан олинган. У Ботир Парпиевнинг жиянидир.

Бундан ташқари, Бухоро вилояти ИИБ бошлиғи ўринбосари, полковник Анвар Парпиев лавозимидан озод қилинган. У Ботир Парпиевнинг укаси Қодир Парпиевнинг ўғли ҳисобланади.

Манба берган хабарга кўра, «Асака» акциядорлик тижорат банки Андижон вилоят филиалининг бошқарувчиси Зафар Парпиев ҳам ишдан кетган. Унинг ҳам Ботир Парпиевга қариндошлиги айтилади.

Шунингдек, Ташқи ишлар вазирлиги Консуллик ҳуқуқий департаменти бошлиғи бўлиб ишлаган Дилшод Парпиев лавозимидан олинган эди. У Ботир Парпиевнинг ўғлидир.

Ботир Парпиев 1946 йилда Андижон вилоятида, милиция генерал-майори Раҳмат Парпиевнинг оиласида туғилган. 1992-1996 йилларда Андижон вилояти ИИБ бошлиғи, 1996-1998 йилларда Ўзбекистон ИИВ Ёнғин хавфсизлиги бош бошқармаси бошлиғи, 1998-2002 – Ўзбекистон ички ишлар вазири ўринбосари, 2002 йилнинг июнь ойидан декабрь ойигача – Ўзбекистон фавқулодда вазиятлар вазири, 2002-2004 – Ўзбекистон Давлат божхона қўмитаси раиси бўлиб ишлаган, 2003 йилда божхона хизмати генерал-лейтенанти унвонини олган. 2004 йилдан буён Давлат солиқ қўмитаси раиси лавозимида ишлаб келган.

Эслатиб ўтамиз, Б.Парпиев жорий йилнинг 11 май куни Давлат солиқ қўмитаси раислигидан олинганди. 19 май куни Миллий олимпия қўмитасида Ўзбекистон таэквондо WTF ассоциациясининг навбатдан ташқари сайлов Конференцияси бўлиб ўтди. Унда Ботир Парпиев ассоциация раҳбарлигидан ҳам озод этилганди.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг