Бир кун ичида тўлақонли меҳмонхона, ошхона ва бошқа қулайликларига эга уйни қуришнинг иложи борми? Бир қарашда буни амалга ошириб бўлмайди, бироқ замонавий технологиялар бир жойда қотиб тургани йўқ ва улар бизнинг ҳаётимизни яхшилашга хизмат қилмоқда.

Яқин-яқингача 3D-принтерлардан фақат майда деталларни яратишда фойдаланилган бўлса, бугунда уларнинг имконияти анча кенгайди. «Hi-News» 3D-принтерлар ёрдамида яратилган материаллардан фойдаланиб 24 соатда қурилган уй ҳақида маълумот берди.

Уйни «босиб чиқариш» билан Американинг «ICON» стартапи ҳамда «New Story» хайрия ташкилоти шуғулланишга қарор қилди. Дастурчиларнинг айтишича, 60 квадрат метр майдонли уйга керак бўладиган материалларни босиб чиқариш учун қурилиш принтерига 12—24 соат керак бўлар экан. Бундан ташқари «ICON» компанияси вакиллари таъкидлашича, уларнинг уйи фасади тўлиқ дастур кодлари ёрдамида босиб чиқарилган ва одамлар яшашига рухсат берилган биринчи 3D уйлар ҳисобланади.

Шунингдек, бу каби уйлар (майдони 80 квадрат метрдан ошмайдиган) анча арзон — битта бинонинг нархи 10 минг доллардан ошмайди, бироқ экспертлар келажакда нархлар яна 2 баробарга арзонлашиши мумкинлигини айтмоқда.

Ҳозирда материалларни босиб чиқариш билан «Vulcan» компаниясига тегишли 3D-принтерлар шуғулланмоқда. Улкан конструкцияга эга эканлигига қарамай, уни осонгина силжитиш мумкин. «Vulcan» 100 та қатламга эга оддий бетон босиб чиқаради ва у қуриш вақтида шаклини ўзгартирмайди. Деворлар эса 2—3 кун давомида қурийди, бироқ ундан ишлаб чиқарилиши билан фойдаланиш мумкин.

Биринчи уй Остинда босиб чиқарилди — айнан шу ерда компаниянинг штаб-квартираси жойлашган.