Ўзбекистон ҳукуматининг 2026 йил 5 майдаги 224-сонли қарори билан фуқароларни яшаш ва турган жойи бўйича рўйхатдан ўтказишнинг янги тартиби тасдиқланди.

Қарорга кўра, рўйхатдан ўтказиш ишлари ички ишлар органларининг миграция ва персоналлаштириш бўлинмалари томонидан амалга оширилади. Бунда фуқарони яшаш ёки турган жойи бўйича рўйхатга қўйиш унинг иштирокида амалга оширилиб, розилиги «Face-ID» ёки «Mobile-ID» тизимлари орқали тасдиқланади.

Янги тартибга мувофиқ, фуқаро янги яшаш манзилига кўчиб келган кундан эътиборан 10 иш куни ичида рўйхатдан ўтиши шарт.

Фуқаролар қуйидаги усуллар орқали мурожаат қилиши мумкин:

• ваколатли органлар;
• Давлат хизматлари марказлари;
• «Ақлли» миграция шохобчалари;
• gov.uz портали;
• «E-xabar berish» тизими.

Шу билан бирга, қарорда айрим ҳудудларда фуқароларнинг эркин ҳаракатланиши ва яшаш жойини танлаш ҳуқуқи чекланиши мумкинлиги белгиланган.

Хусусан:

• чегара ҳудудларида;
• ёпиқ ҳарбий шаҳарчаларда;
• ёпиқ маъмурий-ҳудудий тузилмаларда;
• фавқулодда ҳолат жорий этилган ҳудудларда ва бошқа махсус ҳудудларда бундай чекловлар қўлланиши мумкин.

Мазкур тартиб фуқароларни рўйхатдан ўтказиш жараёнларини рақамлаштириш, давлат хизматларини соддалаштириш ва миграция ҳисобини аниқ юритишга қаратилган.