Аҳоли ва қишлоқ хўжалигини онлайн рўйхатга олиш тадбирининг биринчи кунида фойдаланувчилар фаоллиги кескин ошиши натижасида тизимда вақтинчалик техник юклама юзага келгани хабар қилинганди.

Қайд этилишича, бундай ҳолат шартли равишда “биринчи кун эффекти” деб аталади.

Мутахассисларга кўра, аҳолининг катта қисми дастлабки кундаёқ рўйхатдан ўтишга интилиши сабабли ахборот тизимлари ва серверларга қисқа муддатли юқори юклама тушиши мумкин. Бу ҳолат сайт иш тезлигининг вақтинчалик пасайиши ёки платформага киришда қисқа муддатли техник қийинчиликлар билан намоён бўлади. Шунга ўхшаш вазиятлар АҚШ, Буюк Британия, Канада ва Австралия каби давлатлар тажрибасида ҳам кузатилган.

“Биринчи кун эффекти” ахборот тизимининг ишдан чиқиши эмас, балки олдиндан прогноз қилинадиган ва вақтинчалик ҳолат ҳисобланади. Кейинги кунларда фойдаланувчилар фаоллиги бир маромда тақсимланиб, тизим иши барқарорлашади.

Айни пайтда сервер қувватларини ошириш ва платформа барқарорлигини таъминлаш бўйича зарур чоралар кўрилмоқда. Аҳоли ва қишлоқ хўжалигини рўйхатга олиш белгиланган муддатларда давом этади ва ҳар бир фуқаро ўзи учун қулай вақтда онлайн рўйхатдан ўтиш имкониятига эга, — дейилади расмий хабарда.

Маълумотларга кўра, 2026 йил 15 январь соат 15:25 ҳолатига census.stat.uz портали орқали 208,5 мингта хонадонда яшовчи 1 миллиондан ортиқ фуқаро онлайн рўйхатдан ўтган.

Мутахассислар “биринчи кун эффекти”нинг кузатилиши юртдошларимизнинг мазкур муҳим давлат тадбирига фаол ва масъулият билан ёндашаётганидан далолат беришини таъкидламоқда.