Италиянинг Тошкентдаги собиқ элчиси Пиергабриэле Пападиа де Боттини ва унинг яқин ҳамкорларидан бири Татьяна Тараканова Италия прокуратураси томонидан ноқонуний миграцияга кўмаклашиш ва коррупцияда гумон қилинмоқда.

Тергов маълумотларига кўра, 2024 йил декабрида Тошкентдаги дипломатик миссия раҳбари сифатида иш бошлаган элчи визалар бўлими фаолиятини шахсан назоратга олган. Кўп ўтмай у Россиядаги аввалги фаолияти давридан таниши бўлган Татьяна Таракановани жараёнга жалб қилган.

Айбловга кўра, улар Россия фуқароларига Шенген ҳудудига кириш учун узоқ муддатли туристик визаларни қонун талабларисиз расмийлаштириш тизимини йўлга қўйган. Визалар учун 4 минг евродан 16 минг еврогача пул олингани айтилмоқда. Расмий консуллик йиғими эса атиги 45–60 еврони ташкил этган.

Терговда Москвада жойлашган бир нечта туристик агентликлар ҳам тилга олинган. Улар орқали камида 95 нафар Россия фуқароси Италияга киргани қайд этилган. Айрим ҳолатларда ариза берувчилар консулликка шахсан келмагани, ҳужжатларда эса турли қоидабузарликлар бўлгани аниқланган.

Можаро Италия ташқи ишлар вазирлиги инспекциясидан кейин очилган. Текширув чоғида кўплаб виза ишларида жиддий қонунбузилишлар топилган. Тергов материалларида элчининг «менга пул керак эди» деган сўзлари ҳам келтирилган. У эса бу гаплар босим остида айтилганини таъкидламоқда.

Ҳозирда Италия молиявий полицияси 400 га яқин виза ишини ўрганмоқда. Терговчилар элчининг тахминан 3 миллион евро атрофидаги мол-мулкини ҳам текширяпти.