Бугун Халқ таълими вазирлигида янги вазир Шерзод Шерматов иштирокида пресс-брифинг ўтказилганидан хабарингиз бор.

Тадбирда иштирок этган «Xabar.uz» мухбирининг хабар беришича, Шерзод Шерматов ўқитувчиларнинг обрўсини кўтариш масаласига алоҳида тўхталган.

«Агар бирор бир жойда кимнинг ўқитувчининг ҳурматини жойига қўймаса, уни мажбурий меҳнатга жалб этса, бунга қарши кескин муносабатда бўлишимиз керак.

Жамиятда шу пайтга қадар ўқитувчининг салбий имижи шаклланишига олиб келинган. Агар биргаликда ўқитувчининг ижобий имижини шакллантирсак, ёшларимиз дарсларни яхшироқ ўзлаштиришига, ўқитувчисига қулоқ солишига туртки бўларди.

Яна бир масала. Кейинги пайтда ота-оналарнинг ҳам ўқитувчиларга муносабатлари ўзгариб кетди. Ҳаммамиз биламиз, ёшлигимизда бирон марта ота-оналар бориб ўқитувчига дўқ-пўписа қилганини эслай олмаймиз. Лекин ҳозир аксинча. Илгари ота-оналар изоҳни икки баҳо олган боласидан сўраган бўлса, бугун ўқитувчининг олдига келиб салбий муносабатини билдиряпти.

Жамиятда ўқитувчининг ролини, статусини оширмагунимизгача катта ўзгариш бўлиши қийин», — деди Халқ таълими вазири.