Украина президенти Зеленский АҚШ Россия билан НАТОга оид янги ҳужжатни муҳокама қилаётгани ҳақида баёнот берди. Унинг айтишича, бу эҳтимолий келишув НАТО ва Россия ўртасидаги муносабатларни белгилаши мумкин.

«Мен биламанки, америкаликлар, балки айрим европаликлар ҳам Россия билан – НАТО ва Россия ўртасидаги янги ҳужжатни муҳокама қилмоқда. Улар шундай ҳужжатга эга бўлса, барча масалаларни муҳокама қилишлари мумкин. Лекин мен учун муҳим жиҳат – улар бизнинг НАТОдаги эҳтимолий ўрнимизни биз билан муҳокама қилишсин. Фақат россияликлар билан эмас – биз билан. Чунки бу бизнинг тақдиримизга тааллуқли», – деди Зеленский.

У шунингдек, «кутилмаган ҳолатлар бўлса, Украина муносабат билдиради», дея қўшимча қилди.

Зеленский Женевада бўлиб ўтган уч томонлама музокараларга ҳам изоҳ берди. Унинг сўзларига кўра, ҳарбий йўналишдаги музокаралар сиёсий масалаларга қараганда тезроқ илгарилаган.

Президентнинг таъкидлашича, ҳарбийлар эҳтимолий ўт очишни тўхтатиш режими жорий этилса, уни кузатиш бўйича миссияни қандай ташкил этиш мумкинлиги ҳақида гаплашган. Шунингдек, техник деталлар ҳам муҳокама қилинган.

Украина учун асосий масала – мамлакатнинг хавфсизлик кафолатлари ва келажакдаги НАТО билан муносабатлари. Киев позициясига кўра, Украина тақдирига дахлдор ҳар қандай келишув унинг иштирокисиз қабул қилиниши мумкин эмас.

Ҳозирча АҚШ ёки НАТО расмийлари Зеленский баёнотига жавоб бермаган. Музокаралар давом этиши кутилмоқда.