Украина президенти Владимир Зеленский Яқин Шарқ давлатларига Эрон дронларига қарши курашишда ёрдам беришга тайёрлигини билдирди. Унинг айтишича, агар минтақа етакчилари Владимир Путинни Россия–Украина урушида камида бир ойлик ўт очишни тўхтатишга кўндирса, Киев ўзининг энг тажрибали мутахассисларини юбориши мумкин.

«Яқин Шарқ етакчилари россияликлар билан яхши муносабатларга эга. Улар Россиядан бир ойлик ўт очишни тўхтатишни сўрашлари мумкин», – дейди Зеленский Bloomberg News’га берган интервьюсида.

Унинг қўшимча қилишича, шундан сўнг Украина «дронларни тутиб қолиш бўйича энг яхши операторларини Яқин Шарқ давлатларига юборади».

Президент, шунингдек, ўт очишни тўхтатиш муддати бир ой эмас, балки икки ой ёки икки ҳафта ҳам бўлиши мумкинлигини айтди. Бу вақт ичида украин мутахассислари минтақада фуқароларни ҳимоя қилишга кўмаклашиши мумкин.

Аввалроқ Буюк Британия бош вазири Кир Стармер Лондон Украина экспертларини Форс кўрфази давлатларига ёрдам бериш учун жалб қилиш ниятида эканини билдирган.

Украина президентининг стратегик масалалар бўйича маслаҳатчиси Александр Камишин эса украин мутахассислари «ёрдам бериш ва ўз тажрибаси билан ўртоқлашишга тайёр» эканини таъкидлаган.

Эслатиб ўтамиз, 28 февраль куни АҚШ ва Исроил Эрон ҳудудига зарба берган эди. Шундан сўнг Эрон Исроил ҳамда АҚШнинг Яқин Шарқдаги иттифоқчилари деб ҳисобланадиган давлатларга қарши ҳужумлар бошлади.

Эрон дронлари, жумладан, Саудия Арабистони, БАА, Омон, Кувайт, Қатар ва Кипрдаги АҚШ ҳарбий базаларига ҳужум қилган.