«Mehr-shafqat va salomatlik» jamoat fondi boshqaruv raisi Asrol Mirzahmedov jamg‘armaga kelib tushayotgan mablag‘lar va ularning sarf etilishiga oid ma’lumotlarni taqdim etdi.

10 aprelga qadar fond hisob-raqamiga 57 milliard 613 million so‘mdan oshiqroq miqdorda homiylik mablag‘lari kelib tushgan. Bu haqda «Xabar.uz» manbasi xabar bermoqda.

Ular orasida jismoniy shaxslarning ulushi — 2 milliard 370 million so‘mdan ko‘proq.

10 aprelga qadar fond hisobidan 5 milliard 767 million so‘mdan ko‘proq mablag‘ sarflangan.

Ma’lum qilinishicha, fondga kelib tushayotgan mablag‘lar quyidagilarga sarf etilmoqda:

• koronavirus infeksiyasini yuqtirgan bemorlarga tibbiy yordam ko‘rsatish uchun tegishli tibbiyot muassasalariga dori vositalari, tibbiy buyumlar, laboratoriya reaktivlari va boshqa sarflash vositalarini sotib olishga;
• koronavirus tarqalishiga qarshi kurashish tadbirlariga jalb qilingan davolash-profilaktika muassasalarida dezinfeksiya tadbirlarinin amalga oshirish uchun dezinfeksiyalovchi vosita va asbob-uskunalarni, shuningdek, tibbiyot asbob-uskunalari va maxsus transport vositalarini sotib olishga;
• koronavirus infeksiyasi tarqalishini oldini olish, profilaktika va targ‘ibot ishlariga;
• tibbiyot muassasalarini qurish, rekonstruksiya qilish va ta’mirlashga;
• koronavirus infeksiyasi tarqalishiga qarshi kurashish tadbirlariga jalb qilingan tibbiyot, sanitariya-epidemiologik va boshqa xodimlarga moddiy rag‘batlantirishga.