Xabarlar tezkor Telegram kanalimizda Obuna bo'lish ×

Uy oldi-sotdisida fuqarolarning kommunal xizmatlardan qarzi yo‘qligi haqida ma’lumot olish to‘xtatiladi

Uy oldi-sotdisida fuqarolarning kommunal xizmatlardan qarzi yo‘qligi haqida ma’lumot olish to‘xtatiladi

Foto: «Sputnik»

Uy-joy oldi-sotdisida kommunal xizmatlardan qarz yo‘qligi haqida fuqarolarning ma’lumot olishi bosqichma-bosqich to‘xtatiladi. Bu haqda Adliya vazirligining «Huquqiy axborot» kanalida xabar berildi.

«Bitimlarni notarial tasdiqlash tartibini idoralararo elektron hamkorlikni qo‘llagan holda takomillashtirish chora-tadbirlari to‘g‘risida»gi 2017-yil 27-fevraldagi 106-son qaroriga qo‘shimchalar kiritish haqida Hukumat qarori qabul qilindi.

Ushbu qarorga ko‘ra, ko‘chmas mulklarni oldi-sotdi, ayirboshlash va hadya qilish bitimlarini tasdiqlashda davlat notarial idorasi idoralararo elektron tarzda hamkorlik qilish tizimi orqali:

— 2019-yil 1-yanvardan O‘zbekistonning barcha hududida (Toshkent shahri bundan mustasno) elektr va gaz ta’minoti;

— 2021-yil 1-yanvardan boshlab issiqlik ta’minoti, suv ta’minoti va oqova suvlarni chiqarish bo‘yicha qarzdorlik haqidagi ma’lumotlarni mustaqil oladi.

Eslatib o‘tamiz, 2018-yil 1-iyuldan boshlab, Qoraqalpog‘iston Respublikasi va viloyatlardagi notariuslar ko‘chmas mulklarni oldi-sotdi, ayirboshlash va hadya qilish bitimlarini tasdiqlashda notariuslar quyidagi ma’lumotlarni fuqarolardan emas, balki mustaqil ravishda elektron hamkorlik orqali avtomatik tarzda tekshirishi lozim:

— bino va inshootlarning tarkibi va tegishliligi to‘g‘risidagi;

— soliq to‘lovchining identifikatsiya raqamini;

— doimiy propiskaga ega shaxslar yoki vaqtinchalik hisobda turuvchi (vaqtincha propiska qilingan) shaxslarning pasportiga oid ma’lumotlarni.

Toshkent shahrida esa 2017-yil 1-iyuldan boshlab, ko‘chmas mulklarni oldi-sotdi, ayirboshlash va hadya qilish bitimlarini tasdiqlashda talab etiladigan hujjatlarni (pasport va kadastr yig‘ma jildidan tashqari) notariuslar mustaqil ravishda elektron hamkorlik orqali tekshirishi shart.

Izohlar 0

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring