Urganch shahrida 30 noyabr kuni Xalq deputatlari Xorazm viloyati kengashining navbatdan tashqari sessiyasi ochildi.

Sessiyada O‘zbekiston Respublikasi Prezidenti Shavkat Mirziyoyev ishtirok etmoqda. Bu haqda Prezident matbuot xizmati xabar berdi.

Davlatimiz rahbari Xorazm viloyati iqtisodiyotini rivojlantirish, aholining ijtimoiy sharoitlarini yaxshilash bo‘yicha qator ishlar amalga oshirilayotganini qayd etdi.

Joriy yilda viloyatda 312 ta investitsiya loyihasi bajarilib, yangi korxonalar ishga tushirilgan. Yil yakuni bo‘yicha sanoat mahsulotlari ishlab chiqarish hajmi 16 foiz, eksport 22 foiz o‘sishi kutilmoqda.

100 ta davlat va xususiy maktabgacha ta’lim muassasalari tashkil etilib, bolalarni bog‘chalarga qamrab olish 33 foizga yetgan.

Xorazm uchun muhim bo‘lgan elektr energiyasi va toza ichimlik suvi ta’minotini yaxshilash bo‘yicha ham muayyan ishlar qilindi. 254 kilometr elektr, 456 kilometr suv tarmoqlarida qurilish va rekonstruksiya ishlari amalga oshirildi.

Prezidentimiz o‘tgan davrda yaratilgan ish o‘rinlari yetarli emasligi, viloyatda ishsizlik saqlanib qolayotganini ta’kidladi. Iqtisodiyot tarmoqlarini ko‘paytirish, yangi sanoat korxonalari tashkil etish va mavjudlarini kengaytirish, qishloq xo‘jaligi, turizm va tadbirkorlikni rivojlantirish orqali bandlik darajasini oshirish bo‘yicha topshiriqlar berdi.

Sessiya kun tartibiga Xorazm viloyatiga hokim tayinlash masalasi kiritilgan.

Eslatib o‘tamiz, shu yilning aprelida Xorazm viloyati hokimi Ilgizar Sobirov lavozimdan olinib, uning o‘rniga vaqtincha hokim vazifasini bajaruvchi sifatida Farhod Ermanov tayinlangan edi.