Janubiy Koreyada sud birinchi instansiya darajasida sobiq prezident Yun Sok Yolni hibsga olishga to‘sqinlik qilganlikda aybdor deb topdi va unga besh yil muddatga ozodlikdan mahrum etish jazosini tayinladi. Sud majlisi axborot agentligi Yonhap tomonidan to‘g‘ridan-to‘g‘ri namoyish etildi.

Gap 2025-yil 3-yanvar kuni sodir bo‘lgan voqea haqida bormoqda. O‘sha kuni sobiq prezidentning qo‘riqlash xizmati huquqni muhofaza qiluvchi organlar xodimlarini uning rezidensiyasiga kiritmagan va hibsga olishga yo‘l qo‘ymagan. Yun Sok Yolni hibsga olish faqat ikkinchi urinishda – 15-yanvar kuni amalga oshirilgan.

Prokuratura ushbu epizod bo‘yicha 10 yillik qamoq jazosini so‘ragan edi, biroq sud yengilroq hukm chiqarib, besh yillik jazo bilan cheklandi.

Bu hukm Yun Sok Yolga qarshi qo‘zg‘atilgan sakkizta jinoiy ishdan faqat bittasi hisoblanadi. Ularning to‘rttasi mamlakatda harbiy holat joriy etilgani bilan bog‘liq. Ilgari davlat tuzumiga qarshi isyon ishi doirasida ayblov tomoni sobiq prezident uchun hatto o‘lim jazosini so‘ragan edi.

Yun Sok Yol 2024-yil dekabr oyi boshida mamlakatda harbiy holat e’lon qilganidan so‘ng siyosiy inqiroz markaziga tushib qolgan va lavozimidan chetlatilgan. Bu qaror ommaviy tartibsizliklarga sabab bo‘lgan. 2025-yil 15-yanvar kuni u Janubiy Koreya tarixida ilk bor hibsga olingan amaldagi (biroq vakolatlari to‘xtatilgan) prezident sifatida qayd etildi.

Sobiq prezident keyinchalik ommaviy uzr so‘ragan bo‘lsa-da, bu uning harakatlari yuzaga keltirgan huquqiy va siyosiy oqibatlarning oldini ola olmadi.