Озарбайжон президенти Илҳом Алиев Мюнхен хавфсизлик конференциясида Россияни Киевдаги Озарбайжон элчихонасига уч марта зарба беришда айблади.

Ундан Россиянинг Украинага ҳужумлари давомида озарбайжон компанияларига тегишли энергетика объектлари ҳам зарар кўраётгани ҳақида Владимир Путин билан гаплашган-гаплашмагани сўралган.

Алиевнинг айтишича, бундан ташқари, Киевдаги Озарбайжон дипломатик ваколатхонасига ҳам уч марта зарба берилган.

«Биринчи ҳужумдан кейин биз буни тасодиф деб ҳисоблашимиз мумкин эди. Биз Россиядаги ҳамкасбларимизга барча дипломатик объектларимизнинг аниқ координатларини тақдим этдик – консуллик бўлими, маданий марказлар ва элчихона манзилларини. Шунга қарамасдан, яна икки марта ҳужум бўлди. Демак, бу дипломатик ваколатхонага қасддан қилинган ҳужум эди», – деди Алиев.

Россия Ташқи ишлар вазирлиги эса Алиевнинг баёнотлари «ҳақиқатга тўғри келмаслигини» билдирди.

Россия ташқи сиёсат идораси маълум қилишича, 2025 йил ноябрь ойида Москвадаги Озарбайжон элчисига Киевдаги дипломатик миссия бинолари ва ҳудудига етказилган зарар учун «чин дилдан афсус» билдирилган. Россия томони бу ҳолатни Украина ҳаво ҳужумидан мудофаа тизимининг «нотўғри ишлаши» билан изоҳлаган.