Президентнинг тегишли фармони билан қишлоқ хўжалиги корхоналарини молиявий қўллаб-қувватлашга қаратилган қатор механизмлар жорий этилди.

Ҳужжатга кўра, 2026 йил 1 апрелдан 1 июлгача биржа орқали дизел ёқилғиси харид қилган қишлоқ хўжалиги корхоналарига республика бюджети ҳисобидан субсидия ажратилади.

Унга кўра, ҳар бир тонна дизел ёқилғиси қийматининг 13 миллион сўмдан ошган қисми учун, бироқ 2 миллион сўмдан ортиқ бўлмаган миқдорда субсидия берилади. Маблағлар Аграр соҳада тўловлар агентлиги орқали ажратилади.

Фармон билан 2026 йил 1 сентябрдан Қишлоқ хўжалигини давлат томонидан қўллаб-қувватлаш жамғармасининг айрим субсидия ажратиш ваколатлари Аграр соҳада тўловлар агентлигига ўтказилади.

Жумладан, қишлоқ хўжалиги субъектларига ўз маблағлари ва тижорат банклари кредитлари ҳисобидан етиштирилган пахта хомашёсини биржада сотишда расмийлаштирилган электрон ҳисобварақ-фактура қийматининг бир қисмини қоплаб бериш тартиби жорий қилинади.

Шунингдек, пахта-тўқимачилик кластерлари ҳамда ип-калава ишлаб чиқариш занжирига эга тўқимачилик корхоналарига ўз маблағлари ҳисобидан харид қилинган пахта хомашёси қийматининг бир қисми компенсация қилиб берилади.