Асли келиб чиқиши ўзбекистонлик бўлган тадбиркор Зокир Алиев Қашқадарё вилоятининг Чироқчи туманида қўлга олингани ҳақида хабарлар тарқатилган, кейин эса вилоят ИИБ бу хабарни рад этган эди.

ЎзАнинг маълум қилишича, Зокир Алиев шу йилнинг 16 июнь куни Ўзбекистон давлат хавфсизлик хизмати томонидан қўлга олинган.

Зокир Алиев кўплаб мамлакатларда, хусусан АҚШ ва Россия давлатлари томонидан террорчилик ташкилоти дея тан олинган «Ўзбекистон ислом ҳаракати» аъзоси бўлгани айтилмоқда. У 2014 йилда АҚШ фуқаролигини олган.

Манбада айтилишича, қўлга олиш жараёнида З.Алиев ноқонуний фаолиятига иқрор экани тўғрисида кўрсатма берган. Хусусан, у 2000 йилда «Ўзбекистон ислом ҳаракати»га содиқ бўлишга қасамёд қилган, Афғонистон Ислом Республикаси ҳудудида ҳарбий тайёргарликдан ўтган ҳамда Афғонистон Ислом Республикаси ҳукумат кучлари ва коалиция қўшинларига қарши жанговар ҳаракатларда иштирок этган.

«Ўзбекистон ислом ҳаракати»нинг бошқа аъзолари берган кўрсатмаларга асосан, диний-экстремистик ва террористик фаолиятни амалга оширгани учун 2005 йилда ДХХ тергов бўлимлари томонидан З. Алиевга нисбатан Ўзбекистон Республикаси Жиноят кодексининг 159, 223 ва 244²-моддалари бўйича 646-сонли жиноий иш қўзғатилган.

Ҳозирги пайтда Зокир Алиевга нисбатан тегишли эҳтиёт чорасини қўллаш масаласи ҳал қилинмоқда.