Бизнес-омбудсман 2025 йил учун тадбиркорлик субъектларида давлат назоратини амалга оширувчи органлар фаолиятининг рейтинг баҳолаш натижаларини эълон қилди.

Қайд этилишича, мазкур рейтинг ПФ-184-сон фармон талаблари асосида ишлаб чиқилган ва Тадбиркорликни қўллаб-қувватлаш жамоатчилик кенгаши томонидан тасдиқланган мезонлар асосида шакллантирилган.

Унга кўра, рейтинг:

• Текширувларнинг қонунийлиги ва ўрнатилган тартибда ўтказилганлиги;
• тадбиркорлик субектларининг шикоятлари;
• текширув ҳуқуқига эга мансабдор шахсларнинг аттестация натижалари бўйича шакллантирилади.

Ўтказилган баҳолаш якунларига кўра, назорат органларининг кўрсаткичлари қуйидагича тақсимланди:

• 7 та орган – «Яхши»
• 10 та орган – «Қониқарли»
• 27 та орган – «Қониқарсиз»

Тадбиркорлар билан «Яхши» ишлаган давлат органлари «еттилиги»ни Ҳисоб палатаси бошлаб берган бўлса, кейинги ўринларни – Ўзархив агентлиги,  Давлат захираларини бошқариш агентлиги, Кинематография агентлиги, Фуқаро авиацияси агентлиги, Ўзбекконцерт давлат муассасаси ҳамда Наркотик ва ўқотар қуролларни назорат қилиш агентлиги банд қилган.

«Қониқарсиз» назорат органлари рўйхатини эса Солиқ қўмитаси, Маданий мерос агентлиги, Кадастр агентлиги, Алкогол ва тамаки бозорини тартибга солиш агентлиги ҳамда Фармацевтика маҳсулотлари хавфсизлиги маркази давлат муассасаси бошқариб турибди.

Бизнес-омбудсман матбуот хизматининг ёзишича, мазкур рейтинг тизими назорат қилувчи органлар фаолиятининг шаффофлигини таъминлаш ва тадбиркорлар ҳуқуқларини ҳимоя қилишда тизимли камчиликларни аниқлашга хизмат қилади.