АҚШ президенти Дональд Трамп россиялик ҳамкасби Владимир Путиндан қаҳратон совуқ муносабати билан Киев ҳамда Украинанинг бошқа шаҳарларини ўққа тутмасликни сўради.

“Улар (украиналиклар назарда тутилмоқда – таҳр.) бундай совуқни ҳеч қачон кўришмаган эди. Шу боис мен шахсан Путиндан Киев ва бошқа шаҳарларни ҳафта мобайнида ўққа тутмасликни илтимос қилдим ва у бунга розилик билдирди”, – деди Трамп 29 январь куни Оқ уйдаги мажлисда.

Трампнинг баёноти юзасидан расмий идоралар очиқ изоҳ берганича йўқ. Жумладан, ўқ отишни муваққат тўхтатиш тартиби қачон кучга кириши ҳам маълум эмас.

Буюк Британиянинг Financial Times газетаси журналисти Кристофер Миллер Украина амалдорлари муваққат оташкесимдан Трампнинг баёноти орқали хабар топишгани, бу борада Россиядан бирор ишора бўлмагани ҳақида ёзган.

Кремль ҳам бу хабарни расман тасдиқлаганича йўқ. Путиннинг матбуот котиби Дмитрий Песков ҳозирча бу масала юзасидан изоҳ бера олмаслигини айтган.

Украина президенти Владимир Зеленский эса қаттиқ совуқ шароитида фақат энергетика бўйича сулҳга эришилганини тасдиқлаган.

“Энергетика бу ҳаёт асоси ва биз ҳамкорларимизнинг ҳаётимизни асраш йўлидаги саъй-ҳаракатларини қадрлаймиз. Ташаккур, президент Трамп! Жамоалар бу ҳақда Амирликларда (Россия ва Украина вакилларининг БААдаги музокаралари назарда тутилмоқда – таҳр.) гаплашган эди. Тарангликни юмшатувчи қадамлар урушни бутунлай тўхтатиш йўлидаги реал ҳаракатларга рағбат беради”, – деган Зеленский.

Хабарларга кўра, жорий йил 23-24 январь кунлари БАА пойтахти Абу Даби шаҳрида Россия, Украина ва АҚШ вакиллари иштирокидаги музокараларда вақтинча ўт очишни тўхтатиш масаласи ҳам кўриб чиқилган. Россиянинг Украина энергетика тизимига ҳужум қилмаслиги эвазига Украинанинг Россия нефть объектларига ҳужум қилмаслиги эҳтимоли муҳокама этилган.

2025 йил баҳорида Трамп ва Путин мулоқотидан кейин ҳам энергетика объектларига зарба бўйича 30 кунлик мораторий кучга кирган, аммо кўп ўтмай муваққат келишув йўққа чиққан эди.

2026 йил бошидан бери Россия Украина шаҳарлари, хусусан, пойтахт Киевга бир неча бор оммавий ҳужумлар уюштирди. Ракета ва дронлар ҳужуми оқибатида Киевдаги минглаб кўп қаватли уйларда иситиш тизими ишдан чиққан, сув таъминоти узилиб қолган. Москванинг ҳамлалари Украинада қаттиқ совуқ ҳукм сураётган кунларга тўғри келмоқда.