Украина президентининг маълум қилишича, АҚШ маъмурияти урушни ёз бошигача тугатишни мақсад қилган ва шу йўналишда аниқ музокаралар режасини таклиф этмоқда.

Зеленскийнинг айтишича, АҚШ томони янги энергетик сулҳ (энергетик объектларга зарба бермаслик) ташаббусини илгари сурган ва Украина бу таклифга розилик билдирган. Россия делегацияси эса мазкур масала бўйича жавобни кейинроқ беришини маълум қилган.

Шунингдек, АҚШ илк бор Украина ва Россия музокара гуруҳларининг Америка ҳудудида учрашувини таклиф этган. Зеленскийнинг сўзларига кўра, ушбу учрашув тахминан бир ҳафтадан сўнг Майамида бўлиб ўтиши мумкин. Украина ўз иштирокини аллақачон тасдиқлаган.

Аввалроқ Кремль матбуот котиби Дмитрий Песков янги музокаралар раунди «яқин орада» ўтказилишини айтган эди, аммо АҚШда учрашув ўтказилиши ҳақида гап бўлмаган.

Президент Зеленский музокараларда ҳал этилмай келаётган масалаларга ҳам тўхталиб ўтди. Унинг таъкидлашича, энг мураккаб масалалар Украина–АҚШ–Россия иштирокидаги эҳтимолий уч томонлама лидерлар учрашуви доирасида кўриб чиқилиши мумкин.

Донецк вилояти бўйича Россия бутун ҳудудни ўз назоратига беришни талаб қилаётган бир пайтда, Украина «қайси жойда турибмиз – ўша ерда қоламиз» тамойилини ўт очишни тўхтатиш учун энг адолатли ва ишончли вариант, деб ҳисоблашини яна бир бор тасдиқлади.

«Украина Донбасс масаласида ўз позициясини яна бир бор билдирди. «Қайси жойда турибмиз — ўша ерда қоламз» тамойили, бизнингча, бугунги кунда ўт очишни тўхтатиш учун энг адолатли ва ишончли модел», – деди Зеленский.

Шу билан бирга, Зеленскийнинг айтишича, АҚШ Донбасс ҳудудида эркин иқтисодий зона ташкил этишни муроса варианти сифатида таклиф қилмоқда, аммо бу ғоя на Украина, на Россия томонидан қўллаб-қувватланяпти.

Президентнинг қўшимча қилишича, Запорожье атом электр станциясининг келажаги масаласида ҳам ҳозирча очиқ қоляпти.