Жеффри Эпштейн иши бўйича эълон қилинган ҳужжатларда Microsoft компаниясининг асосчиси Билл Гейтснинг номи тилга олинганидан сўнг, унинг собиқ рафиқаси Мелинда Гейтс жамоатчиликка ушбу вазият юзасидан тушунтириш берди.

Мелинда Гейтс National Public Radio подкастида чиқиш қилиб, Билл Гейтсни Эпштейн билан алоқалари юзасидан очиқ ва аниқ жавоб беришга чақирди. У бу воқеаларни «юракни парчалайдиган фожиа» деб атаб, жабр кўрган қизлар тақдири уни чуқур изтиробга солаётганини билдирди.

«Ҳеч бир қиз Эпштейн уларни олиб кирган вазиятга тушмаслиги керак эди. Бу ҳақда ўйлашнинг ўзи ҳам қалбни оғритади. Мен бугун катта бўлиб қолган ўша аёллар учун адолат қарор топишини истайман. Улар бошидан кечирган азоб-уқубатларни тасаввур қилишнинг ўзи мушкул», – деди Мелинда Гейтс.

Унинг таъкидлашича, мазкур янгиликлар унда оғир шахсий хотираларни уйғотган. Хусусан, у ўз ёшлиги, қизларининг Эпштейин қурбонлари ёшида бўлган даврлари ҳамда никоҳи давомидаги «жуда оғриқли пайтлар»ни эслаганини айтади.

Мелинда Билл Гейтснинг исми Эпштейн ҳужжатларида тилга олингани ҳақидаги гапларга ҳам тўхталди.

«Бу саволлар менга эмас. Бу – ўша одамлар ва собиқ турмуш ўртоғимнинг иши. Улар бу саволларга жавоб бериши керак», – дейди у.

Маълумот учун, Билл ва Мелинда Гейтс 1994 йилдан 2021 йилгача расмий никоҳда бўлган. Ажрим сабаблари орасида Мелинда Гейтс эрининг хиёнати ва унинг Жеффри Эпштейн билан яқин алоқаларини кўрсатган эди. Кейинроқ Билл Гейтс бу муносабатларни «катта хато» деб атаган. 

Эслатиб ўтамиз, молиячи Жеффри Эпштейнга тегишли электрон почта хабарларида Гейтснинг «рус аёллари» билан яқин муносабатлари бўлганлиги, жинсий йўл билан юқадиган касалликка чалинганлиги ва ўша пайтдаги рафиқаси Мелиндага яширинча антибиотиклар бериш учун ёрдам сўраганлиги даъво қилинади.