АҚШ президенти Дональд Трамп Канаданинг Тинчлик кенгашига аъзо бўлиш бўйича таклифини расман бекор қилди. Бу ҳақда у Truth Social ижтимоий тармоғида ёзди.

«Муҳтарам бош вазир Карни жаноблари! Ушбу мактуб орқали сизга шуни маълум қиламизки, Тинчлик кенгаши Канадага юборилган таклифни қайтариб олади. Ушбу кенгаш тарихдаги энг нуфузли етакчилар кенгашига айланиши режалаштирилган», – деб ёзди Трамп.

Эслатиб ўтамиз, бир кун олдин Дональд Трамп қарийб 20 давлат етакчилари иштирокида (асосан Яқин Шарқ ва Жанубий Америка мамлакатлари) ўзи ташаббус қилган Тинчлик кенгаши уставини имзолаган эди. Ушбу янги халқаро тузилма амалда БМТга муқобил сифатида яратилаётгани таъкидланмоқда. Кенгашга аъзо бўлиш учун Россия, Украина ва Беларусь ҳам таклиф этилган, Беларусь эса таклифни аллақачон қабул қилган.

Бундан икки кун олдин Канада бош вазири Марк Карни Давосда бўлиб ўтган Жаҳон иқтисодий форумида нутқ сўзлаб, дунё «ўтиш жараёнида эмас, балки парчаланиш босқичида» эканини айтган эди.

«Буюк давлатлар иқтисодий интеграцияни қуролга, тарифларни босим воситасига, молиявий инфратузилмани мажбурлаш механизмига, таъминот занжирларини эса ўз манфаатлари йўлида фойдаланиш мумкин бўлган заиф нуқталарга айлантирмоқда», – деган у.

У «ўрта даражадаги давлатлар» ўз манфаатларини ҳимоя қилиш учун бирлашиши лозимлигини таъкидлаб, қудратли давлатларга қарши мувозанат зарурлигини билдирди. Шунингдек, Карни Канада Гренландия, Дания ва НАТО иттифоқини қўллаб-қувватлашга тайёр эканини ҳам тасдиқлаган.