Президент Владимир Зеленский 24 феврални президентлик сайловлари ва мамлакат ҳудудий яхлитлиги бўйича референдум ўтказилиши ҳақидаги маълумотларни «биринчи марта эшитаётганини» айтди.

У бу ҳақда 11 феврал куни «Суспiльне» нашри мухбири билан суҳбатда маълум қилди.

«24 февралда эълон қилиш ниятига келсак, мен буни биринчи марта эшитяпман. Биринчи марта, эҳтимол, Financial Times газетасидан эшитдим. Энди эса буни сиздан иккинчи марта эшитяпман.

Мен сайловлар ҳақида кўп марта айтганман, биз сайловларга барча тегишли хавфсизлик кафолатлари мавжуд бўлганда келамиз», – деди Зеленский.

Унинг сўзларига кўра, сайловлар мавзуси «қандайдир» халқаро ҳамкорлар томонидан кўтариб келиняпти, аммо Украина томони бу масалани ҳеч қачон кўтармаган. Шу билан бирга, президент Украина сайловларни ўтказишга тайёрлигини, аммо асосий масала хавфсизлик ҳолати бўлиб қолишини таъкидлади.

«Бу жуда оддий: отишма тўхтатилсин — сайловлар ўтказилади. Бизнинг делегация менинг позициямни билади, у аниқ ва равшан. Улар буни етказишган. Америка ҳамкорлари таклиф этадиган ҳар қандай график билан ишлашга тайёрмиз. Аммо агар референдум масаласи кўтарилаётган бўлса, мен аввал ҳам айтганман — бунинг учун отишмани тўхтатиш бўйича аниқ тушунча бўлиши керак. Чунки референдум ҳам тузилиши жиҳатидан сайлов каби жараёндир», — деди у.

Шунингдек, Зеленский Вашингтон Киевга хавфсизлик кафолатларидан воз кечиш билан таҳдид қилаётгани ҳақидаги гап-сўзларни ҳам рад этди. Унинг айтишича, АҚШ хавфсизлик кафолатларини сайлов масаласи билан боғламаган.

Эслатиб ўтамиз, бир кун олдин Financial Times газетаси манбаларга таяниб , Зеленский 24 феврал куни президентлик сайловлари ва референдум ўтказиш режасини эълон қилмоқчи эканлиги ҳақида ёзган эди. Нашр Украина референдум билан бирга президентлик сайловларига тайёргарлик кўришни ҳам аллақачон бошлаган.